RUACANA- Omupedu minista mouministeli wounamapya Ruthy Masake okwa ti osha fimana ngeenge eefikola tadi ningi oikunino opo ovanafikola va longe oikulya yavo.

Masake okwa li ta popi oshivike sha dja ko pofikola Uahekua Herunga Primary School woshitukulwa shaMusati.

Okwa didilikwa eefikola dimwepo  dina oikunino ya ningwa po kovanafikola.

Oikunino ohai kumwa oikunonwa ya yooloka nelalakano lokudeula ovafikola.

Omupedu minista okwa ti okwa hafa okumona opilimafikola ina ounona tava longo nelitulemo okuyambula po oshinino yavo.

“Opena eefikola dimwe dina eendodo dopombada ashike ina di hala okutota po oikunino yavo,” ta ti.

Okwa  pandula ofikola Uahekua Herunga ta ti otai ulike oshihopaenenwa shiwa keefikola dikwao.

Masake okwa ti oikunino otai etele natango eefikola oyuyeemo yoshimaliwa eshi oikunonwa tai yandifwa kofikola.

Okwa popya ta ti natango oikunino otai longo ovanafikola kombinga yefimano lounamapya.

“Ounamapya owa fimana kovanhu veendodo da yooloka shaashi tau kwafele okuyambula po eliko loshilongo nokueta po eemhito doilonga,” ta ti.

Masake okwa yelifa ta ti okwa li omuhongifikola a longo oshilongwa shounamapya.

“Onga omuhongifikola mu kulu ondi udite etamba nena okumona ovanafikola tava longo oikulya yavo okupitila moikunino,” ta ti.

Omupedu minista okwa ti  naye omunafaalama nokuna oshikunino shaye ha kunumo omanyoto neenyanga.

“Oshikunino shange ohai etele nge oyuuyemo. Oikunino nai pule komesho,” ta ti.

Masake okwa pula  eembelewa dovakulunhuwiliki opo di yambidide eefikola okuninga po oikunino yavo.

Efiku tuu, Masake a taalela po ofikola ei ovanafikola okwa li tava landifa eenyanga nosho tuu okulimonena oshimaliwa.

Ovanafikola pofikola Uahekua Herunga Primary School ova hokolola tava ti paife ohava ningi oyuuyemo yoshimaliwa tashi pitile nokulandifa oikunomwa yavo.

fhamalwa@nepc.com.na