Ouministeli wouhaku nonghalonawa owa holola kutya otau ka pitifa oshikonga shomatunhilo omukifi wopolio oshikando shititatu oshilongo ashishe okudja momafiku 27 Apilili 2026.
Omupopiliko wouministeli wouhaku nonghalonawa Walters Kamaya okwa yelifa kutya moshikonga omu, natango ounona ovo ve li koshi yeedula omu-10 otava ka tunhilwa.
“Okaana nande oka tunhilwa nale oikando ivali ya dja ko, natango oka teelelika ka tunilwe moshikando eshi shititatu,” Kamaya ta holola ngaho.
Etokolo lokutunhila ounona oshikando shititatu ola tulwa moilonga meendelelo, konima eshi kwa didilikwa omukifi wopolio.
Omukifi ou owa didilikwa okudidilila momalambo omeva ohanya osho yo omeva oo haa kala a kangavala ohanya momalukanda a kaka taa hengaanwa keedi.
“Omeva aa okwa nyika oshiponga unene shaashi ounona ohava dulu okukala ve li mekwatafano nao, konyala efimbo alishe,” ta ti.
Oidjemo yopolio ei, oya monika konima eshi ouministeli wa ningila omalambo ohanya kodoolopa yaRundu omakonaakono, ndele tamu monika ombakiteli ei , i li mo i na omwenyo.
Omakanaakono aa natango okwa ningilwa odoolopa yaGobabis, osho yo oWindhoek ndele okwa dja oidjemo tai ulike kutya omeva oku na ombakiteli yopolio.
“Fiyo opapa inatu mona nande omunhu a kwatwa kombakiteli ei okudilila momeva aa a ningilwa omakonaakono ashike okukeelela okudule okupanga,” Kamaya ta ti.
Elelo louministeli wouhaku ola yelifa kutya ombuto yopolio ohai tandavele unene okudilila monyata yomunhu ena opolio, osho yo oikulya, nekwatafa no lokoshipa nomumhu ena ombakiteli ei.
Ouministeli natango owa yelifa kutya elalakano lokutunhila ounona manga kuyela okunghonopaleka ovakwaita volutu omanga inava kwatwa kombakiteli.
Eshi ombuto tai ke ya ngeno i lihanene olutu, kai na apa tai piti.
Oshikonga eshi osha teelelika shi tameke mo27 fiyo 30 Apilili , notashi ke lihanena oshilongo ashishe.
Oshikonga eshi osha yandja yo omhito yoilonga kOvanamibia ava ve na oihauto unene eebaki, opo va shangife oihauto yavo i dule okulongifwa pefimbo loshikonga vo tava futwa kepangelo.
-Taimihaihambo2000@gmail.com