Omupopiliko wouministeli womidingonoko, ovapashioni nomifitu Vilho Hangula okwa koleka ta ti onghela okwa lopotwa ondjaba tai endaenda komukunda Onaanda omanga eendjaba hetatu oda lopotwa komunda Onandjandja moshitukulwa shaMusati.

Mopaife kape na omunhu a lopotwa a monifwa oshiponga ile a dipawa keendjaba edi.

Oshivike sha dja ko okwa lopotwa omukainhu weedula 46 a dipawa kondjaba komukunda Omuguluwombashe kOmusati.

Eendjaba da monika komukunda Onandjandja oda kolekwa kukansela woshikandjahoololo shaNesi Festus Simon, ta ti oda monika Etivali efimbo loufiku tadi ende momapya.

Kansela okwa koleka ta ti eendjaba oda hanauna po omapya ovanhu osho yo eedalate domakove.

Okwa ti ovanambelewa va dja kouministeli womidingonoko ova lopotelwa nale kombinga yeendjaba edi ndele tava fiki nelalakano lokukaleka po eameno loshiwana.

Hangula okwa kumaida oshiwana opo shi kale kokule neendjaba shaashi otadi dulu kukala da nyika oshiponga.

“Oshiwana inashi pumbwa okushikula eendjaba ile okudenga eendjaba. Ondjaba oya nyika oshiponga ngeenge ya shindwa,” ta ti.

Okwa ti ovanambelwa ove lilongekida efimbo keshe okukala va fika koshiwana ngeenge sha lopota eendjaba di li komikunda davo. 

Hangula natango okwa kumaida ovadali opo va popye nounona komaumbo va kale kokule neendjaba shaashi oda nyika oshiponga. 

“Oshiwana nashi lopotela opolifi ile eembelewa dokaansela ngeenge sha mona eendjaba momikunda davo,” ta ti.

Okwa yelifa ta ti kape na omukwashiwana a pitikwa okudipaa ondjaba molwaashi osha puka notashi eta omunhu a kwatwe po.

Ovanhu vatatu ova holoka momhangu yaKahao Omaandaxa konima eshi va kwatwa po shaashi va yasha ondjaba ndele tai lemana komaulu.

Keshe umwe okwe lifutila mo modolongo noN$800.

-fhamalwa@nepc.com.na