Festus Hamalwa
Omukulunhu wehangano lokulwifa omahepeko opaukashike kookanhu loMonica Gender Equality, Human Rights and Social Justice Shaanika Nashilongo okwa ti ovanhu vahapu ova ninga oihakanwa yokukanifa omaliko avo eshi hava kala tava kengelelwa keendudu.
Okwa ti neudo ombelewa yavo oya mona eelopota dihapu eshi ovanhu have u ya okulopota konima ngeenge vaka nifa omaliko avo ngaashi oimaliwa ile eetuwa davo.
Nashilonga okwa hokolola ta ti eendudu odi hole okudengela ovanhu eengodi ta di tula ovanhu mokatoo eshi hadi kala tadi pula ovanhu oshimaliwa omanga dimwe ohandi tumine ovanhu omatumwalaka.
Okwa ti oshivike eshi ombelewa yavo ya mona olopota yomukainhu a tulwa mokatoo kondudu eshi a lilwa shaye N$7000 konima eshi a tunina ondudu.
Okwa hokolola ta ti eendudu ohadi lombwele ovanhu oipupulu kutya ngeenge omunhu okwe mu tumine oshimaliwa ile e mu pe otuwa ota ningi oshipuna, yee vati ota kala e na elao moinima yaye aishe ta longo.
Okwa ti ovanhu vamwe konima ngeenge okwa lombwela kutya ota dulu okukwafa a kufwe omupya ile okuhakulwa oudu wonumba ohava tumine eendudu oshimaliwa shihapu nokonima yefimbo ondudu ohai di mi ongodi yayo.
Nashilongo okwa kunghulila oshiwana opo shi kale shakotokela eendudu shaashi okwa didilikwa eendudu dopaife deli ninga ookalyamupombo.
Okwa weda po ta ti ehangano lavo onghee ngaa natango tali twikile okuxulifa po omahepeko oukashike kookanhu, nokukwashipaleka kutya oufemba womunhu keshe owa fimanekwa.
“Ku keshe ou te kelihanga eli monghalo yokuhepekwa na kale a lopotela ombelewa yetu konomola yongodi ei 0812222077 ile oshiwana shi kale sha lopotela opolifi opo omahepeko oukashike kookanhu a kale axula po.
– fhamalwa@nepc.com.na