OSHUULI – Minista woyeendifo noilonga Veikko Nekundi okwa ti epangelo ota li kwashipaleke okuandjaneka omayakulo eepate koshiwana unene tuu komikunda. 

“Eepate oda fimana moshiwana shaashi otadi kwafele ovanhu opo va dule okufika komikunda,” Nekundi ta ti ngaho. 

Edi minista okwe di popya oshivike sha dja ko pefimbo kwa li ta patulula pambelewa opate ya tungwa komukunda Omulondo- Oshuuli moshikandjohoololo shaShikunde, mOhangwena. 

Opate oya tungwa i li pongushu yoshimaliwa eemiliona N$53. 

Okwa didilikwa ovahongifikola osho yo oshiwana yopomudingokoko opo va kala va taalela omashongo opate ei kwa li ii shaashi okwa li pena efululu. 

Ovanhu ka kwa li hava dulu okushinga eetuwa dishona ngaashi oupolo noutuukala shaashi opate okwa li ina eefululu. 

Minista Nekundi okwa ti pefimbo opate ei kwa li tai tungwa ovanhu 250 okwa li va pewa eemhito doilonga. 

“Osha fimana ngeenge ovanhu va dja pomudingonoko tava tungwa opate opo va pewe oilonga,” ta ti. 

Nekundi okwa ti opate ei ipe oya kwatafana nomikunda nhano osho yo eefikola mbali. 

Oshi li oshinakuwanifa shouministeli wange okukwashipaleka kutya oshiwana osha mona eepate. 

“Ngeenge opena eepate nena otashi pitike ovanhu va shinge eetuwa da yooloka okufika koshiwana ngaashi koupangelo, eefikola nokoitaashi yopolifi,” ta ti. 

Nekundi okwa kumaida ovashingi veetuwa opo shinge noukeka nelalakano lokukelela oipondo yomeendjila. 

“Epangelo melongelokumwe nongudu tai pangele yoSwapo ota li twikile okulonga nelitulemo okuyandjaneka omayakulo a yooloka koshiwana. Epangelo oli na oshisho noshiwana,” ta ti. 

“Ina ndi hala okuuda oiponga yomeendjila ya lopotwa mopate ei. Opate nai longifwe pamukalo muwa,” ta ti. 

Minista okwa ti natango opena opate, i li koshikandjohoololo shaKongo tai ka tulwa ongalama. 

Moshipopiwa shaye, ngoloneya woshitukulwa shaHangwena Kadiva Hamutumwa okwa ti epatululo lopate ei otashi ulike kutya epangelo li li koshi yoSwapo ota li longo nondjungu okuyandjaneka omayakulo koshiwana. 

Hamutumwa okwa ti pefimbo loshikonga shomahoolo, Swapo okwa popya ta ti ota ka yakula nawa oshiwana okuyandjaneka omayakulo. 

Okwa ti natango, opena eepoloyeka dihapu tadi ka longwa mOhangwena ngaashi okutunga eefikola noupangelo. 

“Koshi yepangelo Omupresidente Netumbo Nandi- Ndaitwah oshiwana oshi li momake mawa shaashi omayakulo aishe otaa ka yandjwa koshiwana,” ta ti. 

Ovahongifikola pofikola opo ova pandula minista Nekundi eshi e va tungila opate shaashi paife otava longa noupu okuya koilonga. 

“Nale okwa li hatu ende mopate muna eefululu lihapu. 

Okwa li hatu fiye eetuwa detu dishona komaumbo shaashi hadi dulu okuenda mefululu. Okwa pandula epangelo letu,” omuhongifikola ta ti. 

fhamalwa@nepc.com.na