Paavo Nghikevali (23) okwe shi denga komutwe eshi eya wotete moshiputudilo shaUnam Jose Eduardo dos Santos (JEDS) mOngwediva meifano laye louengineer. 

Nghikevali okwa ti elihongo laye loengineer olali okati komokutwi kuye. 

Okwa weda po kutya okwa kendabala okupita oilongwa yaye noitwa yopombada. Okwa pondola okumona osho hashi ifanwa eedistictions hano oitwa yopombaelela dili 36. Edi okwe di mona okudja modula yotete fiyo oya xuuninwa. 

“Ina ndi dja mepata lomadina shaashi meme kali ha longo. Elihongo lange olo ashike nda kala nda tula komesho fiyo handi shi pondola,” ta hokolola ngaho. 

Nghikevali okwa holola kutya nande ina aka xulifa pokati opo, omatumbulo aye okwa kala etwo mukumo kuye. Okwa ti omatumbulo aina okwa kala nokumupa eenghono nomukumo opo a dule oku ya komesho. 

Okwa twikila kutya eshi ali mondodo onhi 12, okwa pitile nawa nomoshilongo ashishe okwa li omutihamano. 

Eshi eya moUNAM okwa kala elitula mo moilongwa yaye. Aveshe okweva kangela odula yotete nokwa pita noitwa ishambula shili. 

“Onde li hongela konyanya nokulonga kwa nge noudiinini. Molwa okupita kwange, onda pondola okupewa omhito yokufutilwa elihongo lange kehangano loNampower,” ta ti. 

Okwa ti omhito ei yokufutilwa oya kala nokumu kwafa unene pashimaliwa. 

“Onda kala yo handi yambidida ovakwanedimo vange noshimaliwa eshi,” ta holola ngaho. 

Nghikevali okwa ti okwa ka mona yo omhito yoku ya mokomitiye youleli woshiputudilo oo wa kala hau kufa po efimbo laye lihapu. 

Nande ongaho okwa ti eshi inashi mu manena po unene efimbo lokulesha omambo aye. Okwa twikila kutya okwa hala oku twa ovanyasha vakwao omukumo kutya kape na shikukutu shiha xulu, poo kape na shidjuu shiha shuna omutwe moipeta. 

Vati nava kondjife ashike moiputudilo yavo shaashi ‘kokule iha ku fikwa ongula’. 

Okwa ti mopaife ngaha kena manga oilonga ashike opo ngaho ta tale ngeenge ote liwedele ko melihongo laye, ile otaka konga manga oilonga. 

Taimihaihambo2000@gmail.com