Ngoloneya woshitukulwa shaHangwena Kadiva Hamutumwa okwa ti oshitukulwa oshe li pyakidila neeproyeka da yooloka, dina sha nexumokomesho osho yo eyandjo lomakwafo kovakwashiwana.
Hamutumwa okwa ti eeproyeka edi ve li pyakidila nado dimwe odehongo, eembelwa dokuyandja omakwafo koshiwana, eepate, omeva nounamapya osho yo okuxumifa omikunda dimwe po pamufika womalelo eedoloopa.
“Ngeenge tashi ya kehongo, fyee pamufika woshitukulwa otwa kendabala okutunga eesekundefikola da fika puheyali moshitukulwa. Edi oda kwafa okushonopaleka omwaalu wovanafikola ova hava kala va fininana meengulu,” Ngoloneya ta holola ngaho.
Haumtumwa okwa twikila kutya ngeenge tashi ya koku kwafa ovakwashiwana, odoloopa yaEenhana kaina ombelewa yaNgoloneya.
Ombelewa omo hamu kala omutumba ngoloneya woshitukulwa shaHangwena paife kaishi yaye, noku li po ashike omanga ombelewa yaye tai ka tungwa.
Ashike nande ongaho, elelo lodoolopa yaEenhana ola yandja edu kombelwa yangoloneya opo i dule okutunga ombelwa lela ya ukilila ngoloneya yeemwene.
Oshitukulwa natango osha dula okutunga eepate komaushai, unene keefuka oko kuna ashike eendjila domafululu.
“Eenhele edi twa kendabala okutunga eepate ongaashi Oushake-Okankolo, Omulondo-Oshuuli, Onepandaulolo-Ondjele osho yo Oshiti-Okongo,”Hamutumwa ta ti.
Kombinga yomeva nounamapya, ngoloneya okwa ti epangelo ola kendabala okutungila ovakwashiwana eemboola di hapu lela. Ashike nande da tungwa ngaha, dimwe domudo ihadi longifwa natango, omolwa oshimongwa.
“Namwater okwa yandja otendela kovanambelewa veu ye va dinde eembola edi dina oshimongwa, nota va ka dinda omeva meemboola da fika po10,”ta ti.
Okwa twikila kutya natango oshitukulwa oshina yo ondunge yokunenepeka okanala komeva keu ye kevale loshitukulwa shaHangwena, opo va dule okukala ha va mono omeva a wana nawa okupungula.
Okwa twikila kutya natango opena yo oproyeka ya kula oyo tai kufa ombinga kEkoka, inasha nokulongekida edu lounamapya, oyo nayo ili moilonga.
Ngoloneya okwa ti onhele ei oya tulwa nale ongadjo, novanambelewa ove li pyakidila nokuninga omapekapeko enasha nounamapya ou.