Auleria Wakudumo 

Ehangano lokuandjaneka olusheno konooli hano oNorthern Namibia’s Regional Electricity Distributor (Nored) ola holola kutya ola tuma ovanambelewa opo va ka konakone osheetifi shomunailonga wavo oo a xulifa eshi a shokwa kolusheno. 

Omupopiliko woNored Simon Lucas okwa koleka kutya omaunailonga wavo umwe okwa xulifa Omaandaxa lwopo 11h20 manga e li moilonga, ta pangele ongodi yolusheno momukunda Yinsu moshitukulwa shaKavango West. 

Nakufya okwa tongololwa oye Abel Kayembo, oo a li omupangeli womalusheno mombelewa yaNored moNkurenkuru.

“Nonande tu li moluhodi mokukanifa omunailonga pamwe nafye, efyo laye otali tu dimbulukifa okulandula nokuliufa alushe komalombwelo a tulwa po olusheno,” Lucas ta ti. 

Lucas okwa weda po ta ti osha fimana okuninga omukalondjiikilile nomufyuululwakalo kovakwashiwana novanailonga vaNored okukala ve na eshiivo lokuliufa keemhango dolusheno da tulwa po. 

“Nored ota ka ninga omapekapeko okukwashilipaleka eameno lovakwashiwana unene ovakwashiwana moKavango West ngeenge tashi ya kelongifo lolusheno la amenwa,” Lucas ta ti.

Olopota yopolifi oya holola kutya ovanhu vane ova xulifa molwaashi va xwikwa kolusheno moule weemwedi mbali moshitukulwa shaKavango West. 

Omupopiliko wopolifi moshitukulwa shaKavango West Chief Inspector Raimberth Muronga okwa koleka kutya ovanailonga vatatu ova xulifa omwedi wa dja ko omo ovanailonga vavali vaNamwater va xulifa eshi va xwikwa kolusheno. 

Muronga okwa ti ovanailonga ova li tava kendabala okupangela omunino womeva ndele tava xwikwa kolusheno momukunda Nankudu moTondoro. 

Natango, omuhongifikola umwe naye okwa xulifa sha dja eshi a xwikwa kolusheno manga a li te likosho moSiruwo Guest House moNkurenkuru moshitukulwa shaKavango West. 

“Ohatu hekeleke ovakwanedimo vaKayembo pefimbo eli lidjuu,” Lucas ta ti. 

-wakudumoauleria@gmail.com