OSHAKATI – Elelo lodoolopa yaShakati ola pula oshiwana opo shi yandje omadina ovanhu ovo va longa oilonga yomupondo moshilongo opo va lukilwe omapandaanda mOshakati. 

Edi oda kolekwa kumayola wodoolopa yaShakati Leonard Hango onghela. 

Hango okwa yelifa ta ti elelo lodoolopa ola ninga omutumba ndele tali tula po eudaneko opo omapandaanda a kale a lukilwa ovanhu. 

“Otwa teelela omadina ovanhu veendodo da yooloka ngaashi oonakulwa vakulu, ovaleli vopamifyuululwakalo ile ovafitaongalo nosho yo tuu Omunamibia keshe a longa oshilonga tashi hokifa moshiwana,” ta ti. 

Okwa weda po ta ti kashi shi ashike omunhu ha di modoolopa yaShakati ta ka lukilwa epandaanda ashike okwa teelelikwa omadina ovanhu taa di koitukulwa ya yooloka. 

“Ovanhu nava talele po eembelewa damuni ndele tava yandja omadina,” ta ti. 

Hango okwa ti omunhu ta ka yandja edina na kale a shanga omukanda ndele ta yandje omatomheno kutya omolwashike a hala omunhu oo a lukilwa epandaanda. 

Okwa ti odoolopa yaShakati otai ende tai ningi yakula naashi otashi ka eta opo omapandaanda a ka lukilwe ovanhu. 

“Omunhu ngeenge okwa longa oshilonga shiwa moshiwana na tumbalekwe. Ovanhu vahapu ove na eendjokonona diwa notadi yandje ehongo,” ta ti. 

Hango okwa ti ovanhu otava dulu natango okuyandja omadina ovapambele vavo. 

“Muni waShakati ote ke liufa komilandu opo ku kwashipalekwe kutya omadina taa ka lukilwa omapandaanda oovanhu tuu ovo tava pulwa,” ta ti. 

-fhamalwa@nepc.com.na