ONDONGA – Omukwaniilwa woshitunda shOndonga Fillemon Shuumbwa Nangolo okwa ti elelo lavo lopamufyuululwakalo otali ka tota po oshikefa tashi ka tulwa oimaliwa yokuyambidida ounona vanakufya Sam Nepando osho yo ounona ve li monghalo ya nika onghayi. 

Nangolo okwa ti ota ka yandja oN$20 000 tai ka tulwa moshikefa. 

Okwa yelifa ta ti omukunda keshe otau ka yandja N$200 tai ka yandjwa keshe ketameko lomudo. 

Edi Shuumbwa okwe di popya pefimbo loshiviloxupulifo shaSam Pendapala Nepando sha li ko mexuliloshivike komukunda Iikokola moshitukulwa shaShikoto. 

Nepando okwa xulifa momafiku 2 Januali neudo konima eshi a yashwa nondjebo komulumenhu womushiinda shavo pefimbo kwa li ve li moshihongi tava kandula po omukundu wedu. 

Okwa fudikwa Olomakaya komukunda wavo, omo ovanhu omayovi kwa li va holoka momwaalu muhapu va nyika oluhodi okufindikila Nepando. 

Okwa fiya po ounona vaye vatano nomukulukadi waye Kornelia Nepando. 

Omukwaniilwa okwa popya ta ti elalakano loshikefa eshi okuyambidida ounona vaNepando shaashi natango ove li mofikola. 

“Okwa li omulumenhu e hole okukwafela oshiwana nokuyambidida ovakulupe momukunda. Osha fimana opo tu mu tumbaleke okukala hatu yambidida ounona vaye,” ta ti. 

Nangolo natango oshikefa otashi ka kwafela ounona ve li momhumbwe yoikwafifohongo moshitunda shaNdonga. 

Okwa pula oovene vomikunda opo va longe noudiinini okuyambidida oshikefa eshi. 

Omukwaniilwa okwa kumaida oshiwana opo shi kale nombili nokufimaneka omilandu da tulwa po kelelo lavo. 

-fhamalwa@nepc.com.na