Auleria Wakudumo
Oshitukulwa shaShana konooli yoshilongo osha enda nokuyambuka po okudja eshi oshilongo sha manguluka fiyo onena. Nonande osho shishona koitukulwa aishe, Oshana oi na omwaalu wovanhu va fika po 176 674. Oshitukulwa oshi na edoolopa nhatu odo da shi vika nawa Oshakati, Ondangwa nOngwediva. Omu na oikandjohoololo 11: Okaku, Okatana, Okatjali, Ompundja, Ondangwa Rural, Ongwediva, Oshakati – East, Oshakati west, Uukwiyuushona, Uuvudhiya nOndangwa Urban.
Oshakati
Oshakati shaNangobe, shi haiwa nodelela shapo ekalanyanya to djala otaku hokololwa sha dja konima yefiya okudja nghene oshilongo sha mona emanguluko fiyo opaife.
Paife Oshakati oi li oyo shikwete po moshitukulwa shaShana.
Omupopiliko wodoolopa Martin Kapuka okwa holola kutya odoolopa oya yambula po exumokomesho loshitopolwa, okweeta omayakulo oshiwana modoolopa opo ku lundululwe eenghalamwenyo dovakwashiwana nokuyambula po eliko loshitukulwa. “Imwe yomwaayo odoolopa ya xuma komesho moule weedula 36, eepate. Oshakati oya tunga eepate dipe osho yo okulongulula odo da hangwa po omanga oshilongo inashi manguluka. Eepate oda tungwa momapandaada olukalwa lovakwashiwana, da kwatakanifa eengeshefa osho yo odoolopa aishe,” Kapuka ta holola ngaho. Okudja eshi oshilongo sha mona emanguluko, Oshakati oya enda tai tungu oudoolopa vanini. Oudoolopa vanini ve li mOshakati ongaashi Ekuku lina omalukanda ahetatu, Oshakati North oyo yali hai ifanwa nale Ehenye, Okandjengedi, Oshakati Extension 16 nosho tuu.
Kapuka okwati odoolopa oya xwepopaleka omayakulo oshiwana nokweeta omayakulo amuni popepi momalukanda ngaashi Uupindi, Oshakati Extension 10, Oshakati Extension 14, 15 nEvululuko.
Elelodoolopa yaShakati ola kwashilipaleka moule weedula 36 kutya ola yandja edu okutunga eefikola depangelo osho yo dopaumwene, noipangelo opo ovakwashiwana va mone ehongo nouhaku.
Ouwa wa etwa modoolopa konima yemanguluko ongaashi omatala osho yo onhele yokulondekela eebesa ya tungwa keemiliona N$95, eenhele dokulondekela eetaksi modoolopa keemiliona N$3 naikwao ihapu.
Elelo lodoolopa yaShakati ola kuta ovanhu 118, ovanailonga tava kalelele osho yo 142 vopokafimbo osho tashi holola kutya odoolopa otai kondjifa okushuna omwaalu wovanhu vehe na oilonga pedu.
Ondangwa
Ondangwa yaShinime Shiivula nayo oya yambuka po moule womukokomoko weedula 36.
Ngoloneya woshitukulwa shaShana Hofni Iipinge okwa holola pefimbo ta yandje onghalonawa yoshitukulwa yo2025/2026 kutya Ondangwa oya yambula po unene onghalo yomaumbo moshitukulwa.
Moule wo2024/2025 , omaumbo 31 okwa tungwa molukanda Omashaka koShack Dwellers Federation omanga omaumbo a fika po31 a tungwa molukanda Onatsi kehangano loBuild Together.
Eshi osha ningwa okuyandja omaumbo kovakalimo vomOndangwa ovo ve na oyuuyemo i li pedu.
Odoolopa yaNdangwa otai tungu yo okapale kotete modoolopa oko ka kwata efimbo okutula moulonga. Okapale aka oke li natango metifa lokupwa. Oka tengenekwa ka tungwe keemiliona N$60.
Okudja kemanguluko, epangelo ola longa noudiinini okukwashilipaleka kutya olusheno ola andjakana moNamibia aishe.
mOndangwa, okuandjaneka olusheno momalukanda aeshe natango onghene taku twikile.
-awakudumo@nepc.com.na