OMUGULUGOMBASHE – Omupopiliko wouministeli womidingonoko, ovapashioni nomifitu Vilho Hangula okwa yelifa ta ti ouministeli wavo iha u futu omunhu ngeenge e li puma mumwe noinamwenyo yomomufitu ashike oha u yandje omakwafo oshimaliwa she li kwetelela komilandu da tulwa po.

Okwa ti omakonakono omoule kombinga yefyo lomukainhu ou a dipawa kondjaba otaa twikile. “Opena omilandu da tulwa po kouministeli da pumbwa okulandula tete manga ina tu yandja omakwafo oshimaliwa kovapata va nakufya,” ta ti.

Hangula okwa li ta nyamukula elikwatelela kofamali yomukainhu weedula 46, Klaudia Mwaala ou a dipawa kondjaba.

Ofamili otai pula epangelo li va yambidide noshimaliwa okuninga efudiko.

Oshiningwanima osha ningwa oshivike sha dja ko Etine komukunda Omugulugombashe moshitukulwa shaMusati.

Pefimbo, Kundana a talela po eumbo lavo oshivike sha dja ko, Sarti Mwaala, ou eli omumwainakadona wanakufya okwa ti ova taalela eshongo loshimaliwa lokuninga efudiko. “Epangelo ola dopa okukwashipaleka kutya eendjaba ka dili mokati ketu. 

Okwa li lina okukala la tula po ovanambelewa komikunda detu opo va dule okutuamena keendjaba,” ta ti. Okwa ti unene tuu pefimbo eli lodula momapya muna oikunonwa eendjaba oda ninga dihapu.

“Otu li moudjuu shaashi otwa kondekwa keendjaba,” ta ti. Hangula okwa nyamukla ta ti moshitukulwa shaMusati omu na ombelewa i li koRuacana ina ovanambelewa va wana okuyakula oshiwana ngeenge tashi lopota eendjaba di li komikunda davo.

Okwa ti efimbo keshe shiwana oha shi lombwelwa opo shi kale kokule neendjaba shaashi oda nyika oshiponga.

“Oshiwana ina shi pumbwa okushikula eendjaba ile okudenga eendjaba. Ondjaba oya nyika oshiponga ngeenge ya shindwa,” ta ti. 

Okwa ti ovanambelwa ove li longekida efimbo keshe okukala va fika koshiwana ngeenge sha lopota eendjaba di li komikunda davo. Otaku hokololwa kutya omukainhu ou okwa li e li navakwao pefimbo olo kwa li tava taata ondjaba i li momukunda wavo.

Johannes Paulus ou kwa li ve li nanakufya pefimbo tava taata ondjaba okwa hokolola ta ti oshiningwanima eshi oshevatilifa. “Okwa li atu taata ondjaba molwashi okwa li twa hala okulifaneka omafano tuli pondjaba,” ta ti.

Paulus okwa hokololwa ta ti okwa li ve li mongudu yovanhu vahetatu.

Okwa ti nakufya Klaudia tete okwa nukila ondjaba nomushila ndele tai tanauka ndele ta faduka po.

“Okudja opo natango otwa landula ondjaba ashike okwa li ya hanya shaashi okwa li hatu i kupula noiti,” ta ti. 

fhamalwa@nepc.com.na