Ominista yoilonga osho yo oyeendifo Veikko Nekundi okwa ti epangelo ola yandja eemiliona N$22, odo da landa eenhopa doku kaama kombada yomeva da landelwa oitukulwa ya fika puitatu.

Oitukulwa itatu ei tai ka pewa eenhopa edi oyo Ohangwena, Zambezi oshoyo Kavango East. Muimwe yomoitukulwa ei omwa kwatelwa oshitukulwa shaHangwena, omo mu na ofikola yedina Shingunguma Primary, oyo ya pata molwefundja okudilila moAngola, osho yo Onghala Primary oyo ya pata nena nayo.

Nekundi okwa ti ouyelele ou owafika kombelewa yaye, neenhopa oda landwa nale.

“Eenhopa oda fika nale moNamibia okudilila koChina, omo nokuli da tamekwa nale okutumwa koitukulwa ei i na omeva osho yo eefikola da pata,” ta ti. 

Nonande twa fa twa laata kashona, omolwongaho omalongekido oo ohaa pula efimbo okudja kondje yoshilongo, ashike Etitano otwa yakula omakondeina eenhopa e li omuwoi okudilila koWalvis Bay. 

Kansela woshikandjohoololo shaNgenga Joseph Nenghwanya okwa ti eefikola edi hapo lotete tadi pate kefundja, ndele keshe odula konyala ohadi pate. “Neudo otwa kendabala lela pamufika wopashitukulwa fiyo opapa hatu dulu, opo tu dule okuyandja omakwafo osho yo omatwomukumo kovanafikola osho yo keefikola,” ta ti. 

Okwa ti ihashi kala efano liwa okutala ounona ve li momaumbo, manga pe na omakwafo taa dulu okuyandjwa. 

Nenghwanya natango okwa yandja yo olupandu linene kepangelo eshi la endelela po okukwafa ovanhu vomoshitukulwa shaye inapu kalwa. 

-taimihaihambo2000@gmail.com