Ependafule, omukondjelimanguluko woshili Albertina Tuvahanga Heita okwa xulifa oshivike sha dja ko, nokwa tangwa kutya okwa li omunambili e na oukumwe nokwa dana onghandangala yakula pefimbo loita.

Heita okwa xulifa mepupi lomido 70 koshipangelo shaNandjokwe Etine.

Otaku hokololwa kutya Heita okwa kwatwa ashike koshidu okafimbo kashona ndele ta twalwa koshipangelo nokuxulifa. 

Heita okwa li omukalimo womomukunda Etope moshikandjohoololo Omulonga, moshitukulwa shaHangwena.

Omudo 1974, pefimbo e na omido 19 okwa ya koshilongo Zambia novanyasha vakwao opo a dule oku ka lwa oita.

KoZambia okwa ya ko e na odjapo yondodo onhi-10 ashike okwa ka mona omhito yokutwikila ofikola yaye yondodo onhi-11 fiyo onhi-12.

Heita okwa kala ta longo elaka lOshingilisa kokamba yovakwaita moLusaka nokudeula ovanyasha vakwao.

Omudo 1984 okwa alukila moNamibia ndele ta kala ta longo kouministeli woilonga nonghalonawa yovanailonga.

Konima yeedula donhumba Heita okwa mona oilonga kehangano loNamibia Training Authority (NTA) fiyo omudo 2015 eshi a ya mopendjela.

Hamushangandjai wongudu yoSwapo Sophia Shaningwa okwa tanga omukondjelimanguluko Heita ta ti okwa dana onghandangala yakula pefimbo loita eshi a li kombada.

“Ongudu yoSwapo oya pandula oilonga aishe ya longwa kuHeita shaashi okwa li omukondjelimanguluko woshili. 

Omwenyo waye nau tulumukwe nombili,” ta ti.

Ovanamukunda vaye ova hokolola tava ti Heita okwa li omukondjelimanguluko woshili molwaashi okwa kufa ombinga moita nelalakano Namibia a kale a manguluka.

Ovashiinda shaye ove mu tanga tava ti Heita okwa li omukainhu e hole elandulafano, e na oukumwe, e hole okupopifa ovashiinda vaye nokuhole oku ya kongeleka.

Ofamili yaye oya hokolola kutya Heita okwa li omukainhu ehe na okatongo nokuhole okupukulula ovanhu.

Okwa fiya po okaana kaye kamwe.

Omalongekido epako laye oku li metifa.

-fhamalwa@nepc.com.na