OKONGO – Omupresidente Netumbo Nandi-Ndaitwah okwa ti epangelo ola twikile okuyambidida eefikola noikwafifohongo molwaashi otashi kwafele ovanafikola ve lihonge nondjungu osho yo ovahongifikola va longe noupu.
“Ohatukatumaomambonoikwafifohongo ya yooloka keefikola,” ta ti. Edi Nandi- Ndaitwah okwe di popya Omaandaxa, pefimbo a talela po ofikola Oshisho Combined i li moshikandjohoololo shaKongo, koshitukulwa shaHangwena.
Pefimbo ta popi novanafikola, Omupresidente okwa lombwela ovanafikola opo ve honge nondjungu opo a dule okuya koiputudilo yopombada.
“Paife ehongo ola ninga loshali. Itamu futa vali ofikola ngeenge ta mu i koiputudilo yopombada.
Eli olo efimbo liwa opo mu kale mwe lihonga noudinini okupita nawa,” ta ti.
Omupresidente okwa popya ta ti okwa udifwa nai koidjemo yondodo onhi-11 pofikola Oshisho Combined eshi ku na ashike ovanafikola vane va pita ondodo onhi-11.
Okwa yelifa ta ti ondodo onhi-11 okwa li i na ovanafikola 21 ashike ovanafikola vane va pita osho tashi ulike kutya omwaalu muhapu wovanafikola ova dopa.
“Onda hala momudo tau ya ovanafikola aveshe vondodo onhi-11 va kale va pita aveshe,” ta ti. Nandi-Ndaitwah okwa yelifa ta ti naye okwa li omuhongifikola ashike okwa kala ha longo noudiinini okukwashipaleka kutya ovanafikola ova pita nawa. Okwa kumaida ovahongifikola opo va longe nelitulemo nonande va taalela omashongo oikwafifohongo. “Longeni mu na elalakano lokupitifa nawa ovanafikola aveshe.
Inamu teka omukumo,” ta ti. Efiku tuu olo natango, Omupresidente okwa talela po endiki loshiwana shovayelele komukunda Eendobe li li mOkongo.
Okwa lombwela oshiwana shovayelele opo shi ye kofikola molwashi osha fimana ngeenge omunhu a longwa.
“Kaleni tamu longo momapya opo mu dule okulimonena oipalwifa yeni. Ovadali pitikeni ounona veni va ye kofikola,” ta ti.
Okwa weda po ta ti oshiwana shovayelele nashi fimaneke omufyuululwakalo wavo wokulongifa eendongi okupulula omapya ngaashi naana va kala nale hava longifa. Pendiki opo ope na olusheno osho yo eengulu dokuhongela ounona nokukala tava telekelwa eendja.
Okwa ti epangelo ota li twikile okuyambidida oshiwana shovayelele noikulya osho yo omakwafo amwepo. Oshiwana shovayelele osha pandula nenyanu okumona Omupresidente wavo omo she mu lombwela kutya epangelo ola longa nawa okuvafila oshisho.
-fhmalwa@nepc.com.na
