ONGWEDIVA – Epeko loshibofa shomuhongifikola ou a denga omunafikola ha fikola koCharles Anderson Combined mOngwediva ola tumwa kombelewa yomupangulindjai Martha Imalwa nelalakano opo a ninge omatokolo. 

Omukulunhu wopolifi moshitukulwa sha Shana Commissioner Naftal Sakaria okwa koleka onghundandana ei. 

Sakaria okwa yelifa ta ti oshibofa eshi momake opolifi osha dja mo paife ashike oshi li kombelewa yomupangulindjai. 

Konima yoivike ivali okwa lopotwa omuhongifikola womulumenhu ta longele kofikola Charles Anderson Combined a patululilwa oshibofa kuina yokaana shaashi a denga omunafikola molwaashi vati a ula wumwe vomovahongi kutya okuna ‘olungusa.’ 

Otaku hokololwa kutya ina yokaana okwa patulula oshibofa shi na sha nokudenga okaana kaye, hano shomahepeko ounona. 

Otaku hokololwa kutya ina yokaana ka dengwa naye oku li omuhongifikola kosekundofikola i li mOshakati. 

Opolifi oya hokolola tai ti okaana ka dengwa okamati noke li mondodo onhinhano. 

Ot aku hokol o lwa kutya omuhongifikola ou a shivifilwa kumukwao oye e li ta longele koshikondo shi li mofikola yavo shokulonga ounona omikalo ile nghene ve na okulihumbata. 

She likwatelela kouyelele wa dja pofikola opo, omuhongifikola okwa kufa okapaipi kashona ndele ta denge omunafikola ou. 

Nakudengwa okwa ya keumbo ndele ta lombwele ina kutya okwa dengwa komuhongifikola. 

Ot aku hokol o lwa kutya omunafikola a dengwa okwa twalwa koshipangelo opo a ka mone epango lopaunamiti. 

Nokonima ina yomunafikola ou okwa ka patulula oshibofa koshitaashi shopolifi mOngwediva. 

Opolifi oya koleka kutya fiyo opapa omuhongifikola ina kwatwa po. 

Pefimbo vakwatafana noshifokundaneki shetu, ovahongifikola va dja keefikola da yooloka moshilongo ova hokolola tava ti paife otava longo noudjuu shaashi ovanafikola vahapu ova kanifa omikalo. 

“Ngeenge owa pumu omunafikola ka shona, ota ka kombwela ovadali vaye. Kashipu vali okulonga novanafikola unene tuu ovo hava fikola meedoolopa,” umwe womuhongifikola ta ti. 

Okwa ti oshi li shinakuwanifa shomudali keshe a longe okaana kaye omikalo shaashi okupopila okaana ngeenge kehe na omikalo itashi kwafele. 

Omuhongifikola umwe okwa ti ovadali vamwe ova dopa okulonga ounona wavo outeku komaumbo shaashi inava fimaneka ovahongifikola. 

“Naame omudali ashike itashi ti shaashi handi longo ofikola ounona vange inava fimaneka ovahongifikola vavo,” ta ti. 

Okwa yelifa ta ti omudali wokaana aka okwa dopa shaashi ina longa okaana outeku wokufimaneka ovakulunhu. 

Omuhongifikola umwe okwa holola kutya ita popile edengo lepitilila lounona. 

“Ovanafikola vamwe kave na oukolele onghee onga fye ovahongifikola otwa pumbwa ashike okukala twa denga ovanafikola kashona nelalakano oku va ulukila kutya ovanafikola ova ninga epuko ndele ha ku denge unene okaana kovanhu,” ta ti. 

Kombinga ikwao, omuhongifikola umwe okwa ti kape na omudali ta udu nawa ngeenge okaana kaye ka fika meumbo ka ninga omatito ka dinda shaashi ka dengwa komuhongifikola wako. 

“Pefimbo lopaife oshidjuu okulonga novanafikola hava fikola meedoolopa shaashi paife ove shi oufemba wavo kutya ngeenge omuhongifikola okwe va denge otava ka lopotela ovadali vavo,” ta ti. 

Okwa ti eshi sha fimana pefimbo eli loshinanena okukala omuhongifikola ina denga omunafikola shaashi paife osha nyika oshiponga. 

Omukulunhuwiliki wehongo moshitukulwa shaShana Paulina Shapumba okwa li okudengelwa ongodi lwoikando ya yooloka komutoolinghundana ou, opo atyeko sha koshikumungu ashike ita nyanyamukula ongodi yaye.