Abraham Mwanyekange
Hamushanga wevava lovanyasha longudu yoSwapo Ephraim Tuhadeleni Nekongo okwa ti Namibia ke na ashike eedjo dopaushitwe opo a fimanekwe.
Nekongo odo okwe di popya ta nyamukula komapopyo omukalelipo waAmerica MoNamibia John Giordan pefimbo kwa li a pulwa koshikundaneki sha-BBC Focus on Africa a ti Namibia ola fimana unene kuAmerica omolweedjo daye dopaushitwe mwa kwatelwa noikwamahooli, nokwa ti America oku na ohokwe mudo.
Nekongo ta nyamukula komapopyo aGiordan ta ti ota tuku Ovanamibia, “a hala kutya ngeno okwa lu tuhe na eedjo dopaushitwe ngeno inave tu valula noku tu fimaneka? America na koneke kutya kakele keedjo dopaushitwe moNamibia omu na ovanhu ovo ve na okukala va fimanekwa tete kwaaishe, onghee ngee America okwa hala eedjo dopaushitwe detu na tale yoo kovanhu vetu evape omaunhongo ayooloka okulonga needjo dopaushitwe doshilongo shetu. Onda hala okumona Aanamibia tava mono omauwa pakwatafano letu naAmerica” Nekongo ta ti.
Omushiivinawa woikwapolitika Ben Mulongeni okwa ti kuye epopyo lomunadiplomate waAmerica inali mu halufa omolwaasho kutya oku na nale eshiivo la wana nawa shi na sha nomalalakano oshilongo America oo e nine oilongo ikwao, ta ti kashipe noitashi tilifa. “American osho a kala ngaho nopo a fikama pondodo opo ngeenge tashi ya okuhokwa eedjo dopaushitwe doilongo, ngeenge eemhata tala eshi ta ningi poVenezuela”? ta ti.
Mulongeni okwa weda ko ta ti sha weda ombwena oshe ya, nonghee ovakwanepangelo efimbo opaife va ye poshitaafula naAmerica yee ve mu pe eshi ta pula”.
Mulongeni okwa ti ngee efimbo leenghundafana le ya nadi ningwe neh mouwa wOvanamibia nopeenghundafana napa kale omunhu e na oshilongo komutima ndele havaholi ashike voimaliwa naavo itava dulu okuninga omatokolo e li mouwa wOvanamibia.