OKATANA – Omolwoondima ndhoka dhi li metifa, nomuloka omwaanawa tagu tsikile konooli, osha nyanyudha aanafaalama yomapya oyendji. 

Kundana okwa li a talele po aanafaalama yamwe moshitopolwa shaMusati osho wo moshitopolwa shaShana. Omapya ogendji otaga ulike ge na iilya ya talala nawa naanafaalama yomapya oya ulike enyanyu.Maria Nangolo gwomomukunda Olupumbu, okwa ti, omasiku gokulala oga pwa ko, paife ethimbo lyokulonga.”Ngame naanegumbo lyandje ohatu penduka po05h00 yongula, tatu umbu etemo, tse tatu zimbuka po12h00,” ta ti ngaaka.Nangolo ta ti, ethimbo ndika olyo lyokulonga, na itaya tegelele omvula yi loke sha pitilila, yi yulike omapya. “Otatu pandula, oshoka iilya yetu inayi sa omutenya yo inayi kukuta, nonando omvula ya li ya mwena po, ashike inayi kala ko,” ta popi ngaaka.

Ta ti, ombepo otayi pepe nawa nokegulu otaku ulike nawa.

Timoteus Mumbala gwomokunda Uukwangula okwa ti, okwa mana nale okulonga epya lye. “Onda hala ashike omvula yi loke, shampa ashike inayi loka unene iilya yi ye kohi yomeya,” ta popi ngaaka.

Nangula Shikongo okwa ti, nuumvo okwa nika ku na eloolo, oshoka omvula oya piti nawa. Shikesho Natanael gwomukunda Okatana, okwa ti ina pulula natango epya lye, oshoka omvula ndjoka ya loko sigo onena, inayi mweetitha oonkondo dho kulonga.“Otandi tameke okulonga epya lyandje ngele omvula yaFebuluali ya loko nawa.

Ethimbo ndika oku za paife omvula opo hayi loko, ngaashi nana ya ningi esiku tayi ga tilihe no tayi tsikile okuloka,” Nathanael a popi ngaaka.

“Ta ti, sigo oompaka ota pandula, omwiidhi ogwa mena nawa, iimuna oya paluka nawa komalutu” ta ti ngaaka.

Ta popi kutya ayehe mboka yatameke okulonga omapya gawo muJanuali, oyena oku ka teyela iilya oshita,” ta popi nomukumo.

Kundana sho a li a talele po omikunda dhimwe moshitopolwa shaShana ongula yOlyomakaya, aanafaalama yamwe oya li ya piti ye li momapya taya limi.

-vkaapanda@nepc.com.na