Hapo tjerero tjayaruka porukwao mOtjiposa tjOvakuena nOvaherero ohunga nOtjitiro Otjindjandja nOtjisuta tjitjiri mOtjombanguriro Tjokombanda tja Namibia mOtjomuise?

Indi eepuriro ndaingana ozondekurona ngunda a ma zeundju tjiyeri 18 komweze mbumauyende mburi Tjikukutu kutja ovapangure maveyadja oukee mune motjiposa tjomoukoto wotjiposa otjikwao. Otjiveke ihi okuza kOritjavari ovapangure tji ve tji puratenene. Tjitjiri ohunga no ku kondja kokutja Ehi rOvandoitji riye kurizirira orini motjombanguriro ohunga nOnḓuvasaneno Yapamwe, Ojoint Declaration, ousupi OJD pokati ka Namibia nEhi rOvandoitji yo 2021.

Mo 2023, omunane wotjira itji Olandless Peoples Movement, ousupi OLPM, Bernadus Swartbooi, puna ovanane vombazu vOvakuena nOuhonapare wOmbazu wOvaherero kehi yOmbara Otjitambi Mutjinde Katjiua, otji va hitisa otjiposa motjombanguriro tji a ma veningire kokutja tjiyandje oumune wokutja OJD oviporoporo kapena imbyo vina nu munao tji inakaure no ku inambirahi. 

Motjiposa, muvarwe ovengi, Swarbooi novakwao va hungama Omuhaamise wOvihavero vyOmbongarero yOtjiwaṋa, oruveze indo ngwari Onongo Peter Katjavivi; Ombongarero yOtjiwaṋa; Operesidenda; Okambineta nOhahende yOhoromende. Kombunda ave weza ko otjovazirire Ehi rOvandoitji Nozombara zarwe zOvaherero oo Kambazembi, Maharero na Zeraeua. Otjo nai tjitjiri otjiposa moukoto wotjiposa otjombanguriro tji tjari ama tjipuratene otjiveke ihi. 

Ongendo mozondekurona iri pokutja ngahino otjerero ma tji yaruka po rukwao tjimuna mo 2018 otjombamguriro mOmahi Omakusasane wa Amerika tjOrkondua rwa New York tji tja nakaura otjiposa tjOvahrero nOvakuena tjo ku rondora Ehi rOvandoitji ohunga nOtjitiro Otjindjandja. Mokutja penoveta ndjitjizikiza omahi yarwe kutja aye harondorwa mOmahi Omakutasane ya Amerila. Munao oondimwa yotjiposa ndjiri Otjiṱiro Otjindjandja tjOvaherero nOvakuena iyEhi rOvandoitji moruveze rohuurire yaro ya South West Africa, Onamibia oruveze indo otja tjaa ritjiukwa. 

Wina ondari epu enene ro ve rivyure. Ozohahende zohoromende ya Namibia amaze rwisa kutja Ehi rOvandoijti ariheya motjombanguriro kehi yoveta ndjitjizikiza omahi warwe aye ha yetwa movyombanguriro mo Namibia. Tjapo ondimwa motjiposa iho tjinitjini ngunda tjitji hiyatua okupuratewa amuhatarewa.

Ongondoroka notjiposa itji okanepo ko LPM mOmbonagrero yOtjiwana, Utaara Mootu, wapitire muyo omuhaamise wayo tja pandere oku mu yandjere okuzuva Moministera Ondenga kutja ongwaye ohoromende tji ma iungurisa otjimariva tjehi okutjiizikiza Ehi rOvandoitji okuhina okuya kotjombanguriro tja Namibia okuye kuzirira kovitukaungura vyaro oruveze rOhuurire?