OMBAMBIHAKA – Iitopolwa yokonooli y ili itano oya mono oomboola dhomeya dhi li 20 okuza kuuministeli womidhingoloko, iihwa nomapashiyono okupitla mehangano tali ithanwa Namibia Integrated Landscape Approach for Enhancing Livelihood and Environmental Governance (NILALEG).
Oomboola ndhoka dha longwa kongushu yoshimaliwa shi thike poomilliona N$14.4, odha pewa uuministeli wuunamapya, omeya niihwa, mehuliloshiwike komukunda Ombambihaka koshitopolwa shaMusati.
Iitopolwa mbyoka tayi ka andjanekelwa omeya okuza moomboola moka oyo Omusati , Ohangwena, Kavango West, Kunene oshowo Zambezi.
Minista guunamapya Calle Schlettwein, momushangwa gwa leshwa peha lye okwa ti, oproyeka ndjoka yil ilwe komeho kehangano lyo-NILALEG oya totwa po okugandja omayambidhidho nokwiindjipaleka uunamapya.
“NILALEG okwa yambidhidha okutha oomboola oshowo oku dhi tula po noshimaliwa sha zi kehangano tali ithanwa Global Environmental Facility (GEF) okupitila moprogalama tayi ithanwa United Nations Development Programme (UNDP) Namibia,’’ ta ti ngaaka. Ta gwedha po kutya oproyeka natango oyi na etengenekothaneko okutula miilonga omayambidhidho giimuna.
“Ngame mwene ondu uvite nawa oshoka oproyeka ndjika oya longo oshilonga oshinene, ya eta oomboola 20 tadhi ka yambidhidha iitopolwa ayihe itano yokonooli. Natango oya opaleke wo oomboola ndhoka dha li itaadhi vulu okulonga,” ta pandula ngaaka.
Ta ti, oproyeka inayi xwaxwameka ashike omidhingoloko miitopolwa moka, ashike oya hwepopaleka wo oonkalamwenyo dhaakalimo momikalo dha yooloka. “Uupyakadhi womeya wa kala wa taalela aanafaalama kawu shi okuhokololwa, onkene shoka sha longwa okukandula po omaupyakadhi ngoka ga kala ga taalela aanafaalama,” Schlettwein ta popi ngaaka.
chlettwein okwa gwedha po ta ti, ayihe mbyoka oya longwa omolweyitulemo nuudhiginini oshowo elongelokumwe lyo-UNDP oshowo epangelo lyaNamibia.
Minista gwomidhingoloko Pohamba Shifeta okwa ti oomboola dhomeya ndhoka otadhi ka kwathela aantu ya thika 6 790 mwa kwatelwa iimuna yi li 34 000.
Ta ti, mboka ya tula po oombola noku dhi opaleka natango oya gandja omadheulo kaakalimo ye dhi kaleke po.
“Shika otashi holola ashike kutya omapangelo ga yooloka otaga longo nuudhiginini okulongela oshigwana omauwanawa,’’ ta popi ngaaka.
Omukalelipo gwehangano lyo-UNDP Alka Bhatia, okwa ti elalakano okwaandjaneka omeya ga yela moshigwana.
Kakele kokugandja oomboola dhomeya, oproyeka natango oye ya po nondungethaneko yokukala tayi andjaneke omiti koosikola oshowo moshigwana, oshoka omiti ohadhi dhana onkandangala onene.
– vkaapanda@nepc.com.na