Namibia okwa landula iilongo iikwawo okudhimbulukwa esiku lyoradio muuyuni, ndyoka ha li dhimbulukiwa omuvo kehe momasiku 13 Febuluali.
Uuministeli womauyelele nomakwatathano gopaungomba opamwe nehangano lyokukundaneka NBC, oya longekidha okutalela po oosikola nokutseyithila aanona esimano nuuwanawa woradio.
NBC Kati, nena oku li kOkalongo moshitopolwa shaMusati, aawiliki yoradio aaleshinkundana osho wo aaniilonga yalwe yo-NBC otaya monika mOkalongo.
Esiku lyoradio nuumvo otali dhimbulukiwa kohi yoshipalanyolo “Oradio osho wo uunongo wopautekinolohi”.
Uuministeli womauyelele opamwe no-NBC oshiwike shika oya kala nokutalela po oosikola moshitopolwa shaKavango West, okulongekidha esiku ndika nena sho tali dhimbulukiwa.
“Otwa li twa talelepo oosikola Kanuni Haruwodi osho wo aakalimo yokoMaporeza, tatu gandja omalongo gokulongitha omalungula mwa kwatelwa uuwanawa osho wo uuwinayi,” ya fatulula ngaaka.
Ya shanga kutya oya li ya gandja ompito kaalongwa ya kuthe ombinga mooprogalama dha yooloka, shoka sha li she ya uvitha nawa noya li ya nyanyukwa.
Uuministeli womauyelele owa pititha wo kutya esiku ndika otali dhimbulukiwa omolwesimano lyoradio sho ya kala nokugandja omalongo, okutseyithila oshigwana shoka shi na okuuva.
“Sho tatu dhimbulukwa esiku lyoradio, otu shi okupandula iilonga ya longwa koradio sigo opethimbo ndika, notatu tsikile okwiikolelela kuyo,” omushangwa gwa lesha ngaaka. Ogwa kumagidha wo oshigwana shi tsikile okulongitha oomukalo goradio okutaambathana omauyelele osho wo okutumbaleka mboka haya kwatakanitha oradio noshigwana.
Omupopi gwokoradio yOmulunga Lucas Nambala a tseyika nawa “Nambalakats” okwa fatulula kutya oradio oshilongitho shoka hashi andjaneke uuyelele tashi endelele moshigwana.
“Oradio ohayi ndungike momukalo gokugandja omalongo moshigwana. Oradio ohayi etele ndje enyanyu kaaku na we, oshoka ondi uvite kutya onda pwiikinwa koshigwana oshindji,’’ ta popi ngaaka
Nambalakats, omupopi goradio a pyokoka nawa, okwa popi ta ti omanga inoo ya mombepo, owu na okukala aluhe wa longekidha shoka to ka tseyithila oshigwana opo waa ka pukithe omanga wu li mombepo osho wo wu gandje uuyelele wu li mondjila moshigwana sha pulakena.
Okwa popi wo kutya, oha ilongo oshindji okupitila maanawino mboka haya ithanwa ya gandje omalongo gontumba koradio.
“Olundji ohatu ithana aanawino koradio, ihatu kala tu na uuyelele awuhe, ihe ohatu ka tseya oshindji mokupulakena kuyo,” ta popi ngaaaka.
Hellen Andreas a tseyika nawa ‘Nuutoye’ okwa ti okwa longa kooradio dha yooloka okuza mo2014. “Oradio oya simana oshoka ohayi gandja uuyelele moshigwana pethimbo,” ta fatulula ngaaka.
Ta ti, ekuthombinga lyaapulakeni ohali ya gwedhele ko konsteyo ye na oshoka oye shi shoka yo yaa shi. Ta popi kutya oradio ohayi longithwa wo unene omolwongushu yawo, nomakuthikuthi gawo oga thika kiitopolwa oyindji yoshilongo.
Maria Kandenge omupulakeni gworadio, okwa popi ta ti, okwa simaneka oradio oshoka okuuva uuyelele koradio ihashi pula oshimaliwa nando osha sha.
“Oonzonkundaneki dhimwe ohadhi pula oshimaliwa, opo wu vule wu leshe nenge wu tale shoka tashi kundanekwa,” ta popi ngaaka.
-vkaapanda@nepc.com.na