Auleria Wakudumo
Opolifi moshitukulwa shaShana otai kongo ovakwanedimo vomulumenhu weedula 42, omukwashiwana waAngola oo a xulifa efyo likumwifi eshi e lihumbila monhopa yomeva momukunda Okapya mOndangwa Omaandaxa.
Chief Inpector Thomas Aiyambo okwa shivifila Kundana kutya omulumenhu ou okwa hangika ashike nokamutwe koshilongo shaAngola kolutu tashi feekelelwa kutya omukwashiwana waAngola.
She likolelela kokamutwe koshilongo oko a hangika nako, nakufya okwa tongololwa oye Tito Kamati a yambuka poBairro Ekuma moCuanhama moshitukulwa shaCunene moAngola.
Otaku hokololwa Kamati a lefa otaxi okudja kOndangwa ya uka kOshakati.
“Omanga otaksi tai ende konhopa pOkapya, Kamati oo a li omutumba konima okwa nhukila oshiteelinga shotuwa, ta kendabala ngeno okutanauna otuwa,” Aiyambo ta ti.
Chief Inspector okwa ti elao linene otuwa inai wa ko konhopa ashike vati oya keelelwa koikondekifo yonhopa.
Aiyambo okwa weda po ta ti otuwa eshi ya patekena, Kamati okwa nhuka mo ndele te liumbu konhopa ashike okwa fikila pedu.
Pedu okwe litoola po ndele ta lotokele momeva omo a xulifila.
She likolelela kwaavo va li motuwa naye, omulumenhu ou vati okwa holoka a fa e na ounghundi wopamadilaadilo.
Omushingi okwa ti okwe mu kufa konhele yokukwatela outaksi pOluno ta ti okwa uka kOshakati.
Opolifi otai indile keshe ou e na ouyelele opo a kwatafane nopolifi yaShana.
Ngeenge ope na Omunamibia a li ta longelwa komulumenhu ou, opolifi otai indile opo e lilopote popepi nopolifi naye opo ku monike ovakwanedimo vaye.
Meenghundafana naKundana Aiyambo okwa holola yo kutya ovakonaakoni vaNamibia otava ningi onghendabala okukwatafana nopolifi yaAngola opo va mone ovakwanedimo vaKamati.
Ovakwashiwana ve na ouyelele washa otava indilwa va ninge ekwatafano nomupopiliko wopolifi moshitukulwa shaShana Chief Inspector Thomas Aiyambo konomola yongodi ei, 0811228421.