OIPAPAKANE – Elizabeth Joseph weedula 45 oo a ninga eedula monghalo itai nuwa omeva molwaashi vati a lika komayoka, lwoikando ivali okwa veluka filu filu – nota pandula ongeleka.
Joseph oo a li ta di nomainyo mokuulu naye mwene okwali e li ekelela, kali e wete ngee oku na efiku naka veluke, shaashi nokoshipangelo vati okwa lekelwa ko, iha pewa vali omiti nongee edi mona kada li hadi mu kwafa sha.
Oshivike sha dja ko pefimbo Kundana a talela po Joseph keumbo laye, okwa koleka ta ti okwa veluka konima eshi a ningilwa omailikano komufita Saltiel Nghipandwa.
“Omufita okwa ningila nge omailikano lwoikando ya yooloka. Okwa lombwela nge kutya ohandi veluka,” ta ti.
Okwa hokolola ta ti efimbo keshe okwa li ha pi molutu, ye kakwa li ha dulu okunangala kombete.
“Okwa li nda dinda okuulu, ka ninga oluvala lilaula nokudja omainyo,” ta ti.
Okwa weda po ta ti oudio weyoka okwa li tau ende wa uka medimo nokonhulo yaye, yee vati oha kala e na oshinima tashi ende molutu sha fa eyoka. Joseph omukalimo womomukunda Oipapakane moshitukulwa shaHangwena, okwa hokolola ta ti tete okwa lika keyoka momudo 2015 pefimbo kwa li a hangika koilonga pOmafo, efimbo lomutenya.
“Onda tetwa okuulu nokaoko nokudja opo onda kala ndi li kokatemba,” ta ti.
Okwa hokolola ta ti momudo 2021 okwa lika vali keyoka meumbo lavo efimbo loufiku, omo a hangika nale a ninga oshilema e li kokatemba “Okudja opo okuulu kange oka tameka taka ningi kalaula. Onda ninga efimbo lile moshipangelo handi mono epango ashike kape na elunduluko,” ta hokolola.
Okwa hokolola ta ti kakwa li shipu molwaashi okwa li alushe a kwatwa komhepo yokulimangeleka. Joseph okwa kala nokutambulilwa moshipangelo lwoikando ya yooloka ashike onghalo yaye itai lunduluka.
Nonande okwa li ha pewa omiti koshipangelo ouheyame onghee nga wa ende tau pimbile. Ovafita veengeleka doiveva da yooloka ova ninga eenghadabala okuyandja omayakulo omailikano ashike onghalo yaye kakwa li tayi lunduluka.
Eshi a kwatafana naKundana, omufita Saltiel Nghipandwa okwa koleka ta ti okwa yandja omayakulo omailikano komukainhu ou konima eshi a lesha ehokololo laye moshifo kutya okwa lika keyoka.
Nghipandwa okwa ti okwa kala nokudengela Joseph ongodi te mu ningile omailikano.
“Kandi na ongeleka manga ashike ohandi yambidida ovanhu tava vele,” ta ti.