Okatana, Shikudule nOshikunde dhi ikutha ondhino 

Okatana, Shikudule nOshikunde dhi ikutha ondhino 

ONGWEDIVA – Aanasikola koosekundosikola Okatana, Shikudule nOshikunde nuumvo odha ulike kutya nande oho iyogo momuthima ngoye to lesha kokalehite oto vulu oku shi pondola u vule naamboka haya nu otee nomboloto yi na ondjema kehe siku. 

Oosikola ndhika ndatu, odhi li dhimwe dhomoosikola ndhoka dhe shi enditha nawa, nodhi li mokati koosikola 10 dhingi momakonakono go-NSSCAS no-NSSCO. 

Oosikola ndhika ndatu, adhihe dhi li konooli, odhi li kiitopolwa yokuushayi, hoka aalongwa haya ende iinano iile yo yamwe oya kalela osikola momahala kage li muundjolowele wokwiilongela.

Oosikola ndhoka ndatu odha endele pamwe noRuacana Vocational Senior Secondary, Ekulo osho wo Cabatana mboka ya yi oshikando shotango momusholondondo gwoosikola dhingi 10 moshilongo.

Ndhika odha dhenga mo oosikola ndhoka dha kala hadhi tilika.

Oosikola ndhoka nonando inadhi kala mo mokaalita koosikola 10 dhingi moshilongo, omumvo gwa yi odha hula ko oongaku, ngashingeyi odhi li dhimwe dhomwaandhoka dhingi mokaalita kelongo.

Osikola dhimwe dhomwaandhoka dhe shi enditha nawa opo dha tameke okushanga ekonaakono lyo-NSSCAS, ihe odha mono iitsa tayi mwenyeke.

Omukuluntusikola gwosikola Okatana Senior Secondary moshitopolwa shaShana, Marcus Hango okwa totha mo kutya ongomukuluntusikola opamwe naalongi naalongwa osho wo aavali oya longele kumwe okutula osikola yawo pondondo mpoka yi li nena.

“Shotango eyitulemo nokulonga nuudhiginini, shono osho shimwe she tu tula ponkatu mpaka. Esimaneko, eyidhopo mo lyaavali osho wo iinyangandhalwa ya yooloka posikola nayo oya yambidhidha noonkondo,’’ ta fatulula ngaaka.

Hango okwa ti, oha kambadhala wo okwiithana aalongi okuza koosikola dhingi dhi li mokaalita osho wo aakuluntu yelongo opo ya gandje omalongo kaalongwa yawo nkene ye na oku shi enditha nawa.

Ta ti, natango oha hiya wo aalongwa aakulu, mboka ye na omayithano ga yooloka opo ya gandje omakumagidho kaalongwa yo ya gandje nkene ye shi pondola opo ya thike poonkatu mpoka ye li nena.

“Aalongi posikola yetu oya pyokoka nawa. Ngele tatu ningi ootutsa dhaalongi okutaamba posikola ohatu kwashilipaleke kutya otatu kutha lela ngoka a pyokoka nawa nota vulu okuhumitha komeho osikola ndjika, shoka osho shimwe sha kwathele osikola yetu yi ye pombanda,” ta fatulula ngaaka. Okwa yelitha wo kutya ngele taya taamba aalongwa ihaya tala kwaamboka ye na iitsa yi li nawa, ihe ohaya taamba kehe okanona taka ningi omayindilo pethimbo.

Ta gandja oshiholelwa kutya aalongwa oyendji ye li posikola Okatana oya zi ashike koosikola dhi li momundhingoloko naashona ya za kokule.

Hango okwa ti, osikola Okatana okwa li ya totwa po momumvo 1932, nokwa li a tameke okulonga po mo2013.

“Nonando osikola yetu ya kala tayi shi enditha ngaa hwepo, oye shi pondola okuya momusholondondo dhingi omolwiinyangadhalwa ya kala nokutula miilonga,” ta fatulula ngaaka.

Omukuluntusikola kosikola Sakaria Shikudule Combined, Pastoli gongeleka yaAngelican mOngwediva  osho wo mayola gwondoolopa yOngwediva Tarah Shalyefu okwa popi kutya egwanithepo lyiinakugwanithwa, eyitulemo nokulonga nuudhiginini oko oshipatululo shokusindana.

“Ku na esiku wu ndope ngele oto gwanitha po shoka shi na okugwanitha po pethimbo noku shi ninga nuudhiginini. Onda kala nokupulwa kutya ohandi gwanitha po ngiini iilonga mbika itatu, ihe eyamukulo lyandje limwe ashike “eyitulemo”, ta fatulula ngaaka.

Shalyefu okwa ti, nonando esiku limwe olya piti ko ke po posikola, omolwokugwanitha po iilonga yilwe, iithigilwa ayihe oha adha ya gwanithwa po ngaashi yi na okulongwa.

Ta gwedha po kutya osikola yawo oya kala noku shi enditha nawa nale, nonando kakwa li yi li momusholondondo goosikola dhingi omulongo moshilongo, moshikandjo shawo oya kala oyo yi li kotango omimvo adhihe dha piti.

“Shoka sha simana okukwashilipaleka kutya aalongi naalongwa otaya gwanitha po ngaa shoka shi na okugwanithwa po, osho wo okupukululwa mpoka taya nyengwa,” ta popi ngaaka.

Shalyefu okwa kumagidha oosikola dhimwe dhi longe dhi itula mo osho wo okukala aalongi naalongwa mooha ethimbo alihe.

Omukuluntusikola gwOshikunde Combined  moshitopolwa shaHangwena, Moster Simasiku okwa popi kutya osikola oya thiki pondondo mpoka yi li omolwokulonga nuudhiginini. vkaapanda@nepc.com.na