Minista womidingonoko, ovapashioni nomifitu Pohamba Shifeta okwa yelifa ta ti ouministeli wavo itau kelele ovanhu va ka likole oshuungu nokapuka ashike ovanhu nava ka tale tete omikanda depitikilo keembelewa domalelo opamifyuululwakalo. 

Shifeta okwa ti omunhu keshe okwa manguluka okulikola oshuungu ashike na landule omilandu da tulwa po. 

Okwa didilikwa efimbo e li ovanhu hava ka likola oshuungu nokapuka koshitukulwa shaMusati koshitunda shOngandjera, noKunene. 

Ovanhu ohava ka konga oshuungu nelalakano lokulandifa nosho yo oku limonena oshivelelwa. 

Oshuungu ohashi denge po omukaa nokuetela ovanhu oyuuyemo yoshimwaliwa molwaashi ohashi landwa unene. 

Minista okwa ti ombelewa yaye oya lopotelwa kombinga yovanhu tava ka konga oshuungu koshikunino shoinamweno Etosha National Park. 

“Nashi mone exulilo. Osha nyika oshiponga molwaashi kEtosha oku na eenghoshi,” ta ti. 

Okwa ti ina hala okuuda omunhu ta ka lopotwa a monifwa oshiponga ile a dipawa koifitukuti. 

Omupopiliko welelo laNgandjera Sakeus Shangula okwa ti elelo lavo ohali yandje omikanda depitikilo kovanhu opo va dule oku ka likola oshuungu nokapuka. 

Okwa yelifa ta ti omukanda wepitikilo ou na eeN$100 momunhu keshe. 

Shangula okwa ti elelo ola unganeka oovene vomikunda nookapatashu opo va kwashilipaleke kutya omunhu keshe ehe na omukanda wepitikilo ota ka tewa ko komudingonoko haku likolwa okapuka. 

“Oshimaliwa osho hashi futilwa ohashi longifwa kelelo okuandjaneka omayakulo komudingoko haku likolwa oshuungu ngaashi okufuta ovanhu va tumwa oku ka tula po elandulafano,” ta ti. 

Okwa yelifa ta ti oshitunda shaNgandjera otashi ka pitika keshe omunhu a ka likole okapuka noshuungu. 

“Ohatu yakula ovanhu va dja koitukulwa ya yooloka hava pewa omikanda depitikilo okulikola okapuka,” ta ti. 

Okwa kumaida oshiwana opo shi kale nombili noukumwe ngeenge tashi likola oshuungu nokapuka. 

-fhamalwa@nepc.com.na