KONGOLA – Bayahi ba bañwi kwa Kongola mwa sikiliti sa Zambezi ba bilaezwa kikupahama kwa lipiho za kutoba kwa tolongo ya Menias Brian Libuto. Hana bulela ni ba bihi ba makande Labulalu sibuabui wa sikwata Kilo Manyando, naize kubihilwe lipiho za kutoba mwa sitokisi zene kuzwelela siteshini sa mapokola hasikwalulwa mwa silimo sa 2014. Mwanako yeo mapantiti bamashumi amalalu ka alimuñwi neba tobile, mi kibasupile feela bane batamilwe hape.

Zeo naize libea bupilo bwa sicaba sa Kongola ni libaka zeli bukaufi mwa kozi. Manyando naize zeo hape likona kufofaza litaba za lipisinisi sina silao hasina ni lifolofolo za naheñi ze ñata. Mwa liñolo la lipilaelo lene litambekilwe ku Yomuhulu wa Sipokola mwa sikiliti sa Zambezi Andreas Shilelo, sikwata nesi kupile mapokola kunga muhato kuli sicaba sikone kuikutwa kusilelezwa.

“Luikutwa kuli sicaba sa Kongola hasi saliyo mwa buiketo bakeñisa lipiho zeo, ki nakonyana feela muka utwa kuli kushwile mutu,” nekubaleha liñolo la lipilaelo. Nebaize muyaho utokwahala kuyahiwa sinca ni kuekeza kwa nombolo ya mapokola kwa siteshini.

 “Muyaho mokukwalelwa mapantiti uikemezi unosi inge ndu feela, kusina ko ngunganywa. Nako kaufela mapokola baikopanya ni mapantiti, mi haba kwalula sikwalo kubunolo kuba takalala ni kuba nata,” nekubilaezi sicaba.

Mwa manzwi ahae Shilelo naitumelezi kuli lipilaelo za sicaba za utwahala. Naize kutoba kwa cwalecwale kwa mapantiti neli litaba za kusatokomela kwa mapokola bane bali famusebezi. Naize taba ya silelezo iswanela kuba yona ya pili, kono mapokola babañwi neba siyo famusebezi kusina mabaka.

Nabulezi hape kuli haiba mapokola haba isezi maikuto kwa musebezi ni kubona kuli mapantiti bakantelwa, bakana batoba. Naize patisiso kwa siteshini sa mapokola hala mapantiti bane batobile mwa kweli ya Ñulule, nefumani kuli muyaho mokukwalelwa mapantiti una ni kulundululwa. Nakupile sicaba kuswalisana ni mapokola kulwanisa bubangoki.