Abraham Mwanyekange 

Uuyuni Lukanos a shivika nedina Master World naye okwa waimina ovashikingalo vakwao Ovanamibia ovo ve na eemusika davo da talika kovanhu va koya pomiliona koYouTube odula ya dja ko. 

Master World konima yeemwedi omuwoyi oku na oungalo vaye vatatu ve mu tula pombada eshi va talika kovaholi veemusika. Okangalo kedina ‘Don’t trust a women’ oka talika kovanhu ve li peemiliona 2,1 moule weemwedi hetatu, ‘Beelone Beatz’ moule weemwedi heyali eemiliona 2,3 omanga ‘Ngwanyana Wa Motswana’ omiliona 1,4. Master World okwa lombwela Kundana ta ti ohashi pula elitulemo osho yo okulonga novanhu ava ve udite ko omalungula opo eengalo doye di tambulwe ko komahangano okuandjakaneka eemusika. 

“Onda andjakeneka eengalo dange nehangano ledina Tunecore, lo olo la kwafela nge unene opo eengalo dange di tambulwe ko naame ndi dule okufutwa oshimaliwa ngeenge eengalo dange da danwa okupitila komapandja okomalungula ngaashi oYouTube namakwao,” ta ti. 

World okwa ti paife ota ningi oshimaliwa okupitila komapandja okomalungula omo ta ti keshe komwedi oha mono oshimaliwa okudja pomayovi ahamano mokangalo kaye kamwe oko katalika kovanhu va koya pomiliona imwe. 

World okwa ti okwe lilongekida okuyandja omakwafo kovashikingalo Ovanamibia ovo navo va hala okufutwa okupitila komalungula. Ta ti paife okwa pyokoka nawa note shi endifa nawa pashimaliwa. 

“Paife ohandi indile kepangelo letu opo li longe noudiinini opo Namibia nalo li tambulwe ko nawa komapandja okomalungula oshoyo omahangano oo haadulu okufuta ovatotipo vomusika osho yo oinyandwa,” ta indile. 

World okwapula Namibia Society of Composers and Authors of Music (NASCAM) opo litameke okuhonga nokuyandja omapukululo e na sha nehumifokomesho loinyanyangidwa yovashikingalo osho yo ovanyandi. 

World okwa mona ovalanduli vahapu nawa naavo va hokwa eengalo daye koYouTube nokoTikTok ta ti longifeni eengalo daye ngeenge tamu ningi ouvidio. -abbenghilai@gmail.com