Minista gomauyelele nomakwatathano gopaungomba Emma Theofelus sho a li a talele po omupresidente omukulu omutiyali Hifikepunye Pohamba pegumbo lye kOkanghudi moshitopolwa shaHangwena Etitano, okwe mu fatululile mpoka pwa thikama elongitho lyopaungomba. Theofelus okwa li wo a talele po osikola Okanghudi.
Theofelus okwa popi wo nkene taya kondjitha okunkondopaleka nokufatulula esimanolongitho lyomakwatathano gopaungomba.
“Onda thiki mpaka nena opo ndi ku tseyithile iilonga tu li metifa nayo kombinga yokwaandjeka iilongitho osho wo okugandja omalongo kombinga yesimano lyomakwathano gopaungomba moshilongo,” ta fatulula ngaaka.
Minista esiku ndyoka okwa li a talele po osikola Okanghudi hoka a li a gandja omagano goongodhi oonene dhi li polupe lopakompiyuta dhopeke dhi li hamano.
Esiku ndyoka okwa li a kumagidha nokufatululila aalongi, aalongwa osho wo aanamukunda esimano lyemanguluko lyaNamibia osho wo omauwanawa ngoka oshilongo shika shi na, nankene ye na oku ga longitha.
Theofelus okwa popi ta ti eyilongo lyopautekenika ka li tegelela omuntu, onkene Namibia oku na okwiilonga nokweendela pamwe nalyo.
“Ta ti ngele oosikola tadhi ende pamwe nuutekenika osho wo uungomba otadhi ka gandja wo oompito kaalongwa ye na uunongo wontumba okuulika iitalenti yawo, okupitila momayilongo gopautekenika. Oosikola dhi na ookompiyuta niilongithomwa yopaungomba odha simana moonkalamwenyo dhaanona ayehe,” ta fatulula ngaaka.
Ta ti, okulongitha ookompiyuta oku na ompito ombwaanawa okuhumitha oshilongo shika komeho.
Ta gwedha po kutya, monakuyiwa, monkatu ndyoka ontine ya taalelwa, kehe gumwe okwa tegelelwa okukala e na ontseyo yopaungomba, oshoka oshindji oko tashi ka pitila.