Aalandithi aashona momatala gaMuthiya moshitopolwa shaShikoto mehuliloshiwike oya pandula sho ya landwa nawa kaanambelewa ya yooloka mekwatelokomeho lyakansela gwoshikandjohogololo Omuthiya Erastus Nekomba.

Sha ikwatelela kuuyelele wa pitithwa koombelewa oonene dhoshitopolwa shaShikoto, Nekomba okwa longekidha okusapota aalandithi komatala gOmuthiya nelalakano lyokuhwahwameka onkalo yokuyambidhidha mboka taya nyangadhala.

“Elalakano okuyambidhidhathana osho wo okukokeka eliko mondoolopa, onkene ngele oshigwana tashi kala tashi landa omwiha gwasho kaalandithi mboka, otashi ya pe wo omukumo nokulundulula oonkalo dhawo,” ta ti ngaaka.

Shikomba okwa ti, edhiladhilo ndyoka okwe ya po nalyo ongomukalo gokuyambidhidha nokutsa omukumo aalandithi mboka oyo haya dhana onkandangala onene mokukokeka eliko mondoolopa.

Rosalia Kapuka ngoka ta landitha okapana okwa popi peha lyaalandithi momatala, okwa ti esiku ndyoka okwa li yu uvu nawa oshoka oya hololelwa kutya nayo oya simana ngaashi aaniilonga ayehe moshilongo.

“Ohashi gandja oonkondo ngele omuleli ta thiki putse, nonando tatu gandja omakemo getu, nani ohaga uvika. Inatu shi ningilwa nale shi li ngeyi,” ta popi ngaaka.

Kapuka okwa ti oha hupile ashike mokapana ke okuyambidhidha aakwanezimo ye.  Minista guuyuuki Wise Immanuel omwedhi gwa zi ko naye okwa li a yambidhidha aalandithi aashona, sho a li a landele aaniilonge ye okapana koshimaliwa sha pita N$20 000.

Okwa ti okwa li a landa ngaaka nelalakano lyokuyambidhidha aanangesheya aashona.

Kansela gwoshikandjohogololo shaKongo moshitopolwa shaHangwena Ephraim Shipindo omukulu okuyambidhidha aalandithi aashona, sho kwa li ikuthile oshinakugwanithwa shokuyambidhidha aalandithi yomomapandaanda mOkongo sho a li e ya pe iipakete yoohi opo ya gwedhe poongeshefa dhawo.

Shipindo okwa ti okwa li a topolele aalandi iipakete yoohi mbyoka ya pewa ombelewa yoshikandjohogololo shaKongo kehangano lyaIyaloo Women Investment CC okupitila muAnastacia Healo.

“Otwa li twa  gandja omakwatho ngoka kaanangeshefa aashona oshoka oonkambadhala dhawo otu dhi wete. Otwa hala ya gwedhe po poongeshefa dhawo opo iiyemo yi kale yi li hwepo. Aantu mbaka ohaya kwathele oofamili dhawo, ohaya futile uunona oosikola okupitila moongeshefa ndhika nonande ihaya mono iiyemo oyindji, onkene nayo oya pumbwa omayambidhidho,” Shipindo ta ti. Shipindo okwa ti ombelewa yoshikandjohogololo oya li ya konga omakwatho opo yi yambidhidhe aalandithi mboka ya adhika ye na shoka taya landitha ihe ka yi shi kehe gumwe ngoka ta ti ye omunangeshefa.

-vkaapanda@nepc.com.na