Auleria Wakudumo 

Omulumenhu weedula 26 okwa tulwa moipandeko molwaashi a hanauna po oradio yomudidimbe, okompiuta, omakende eenduda, ouhalasha, nomalodu sha dja eshi a pulwa a fute vati oN$1 500. 

Oshiningwanima osha ningilwa monhele yokudja yopokafimbo, Egumbo Guest House mOshakati, sha ningwa Omaandaxa po02h00 lwaapo. Eshi osha kolekwa komupedukulunhu wopolifi koshikondo shokukonakona oimbuluma moshitukulwa shaShana Frederick Ndjadila. 

Otaku hokololwa omulumenhu a li omutumba monhele yokunwina ta pula omalodu. 

Eshi a mana okunwa vati ovalandifi ove mu etela omwaalu woshimaliwa osho e na okufuta shi fike poN$1 500. 

“Mokupulwa oshimaliwa shovanhu, omufekelwa okwa fufaeka shaashi vati oshimaliwa oshi li pombada ndele ta hovele okuhanauna po nokutatula oinima yovanhu monhele yokunwina,” Ndjadila ta ti. 

Omufekelwa okwa hanauna nokutataula oradio yomodidimbe, okompiuta, omakende eenduda, ouhalasa vokunwina osho yo omalodu ta tatulile koshitaafula shokulandifila. 

Otaku hokololwa omufekelwa a hanauna po vati nodalate yolusheno oyo ya kwatafana nomuvelo wokuuya mo. 

Moipilikisha, mwene wonhele yokudja pakafimbo umwe okwa tetwa kekende nokumona oshiponga. Opolifi oya holola kutya omwaalu wongushu yoinima oyo ya hanauna po opo tau shiivifwa. 

Otaku hokololwa kutya omufekelwa opo ta ende po lwotete ponhele opo na kaku na ouyelele wofaafaa kombinga yaye. 

-wakudumoauleria@gmail.com