Omulumenhu weedula 25 okwa kwatwa po konima eshi vati a kwata inamweno onghonga weedula 65 meumbo lavo. 

Oshiningwanima osha ningwa Etivali komukunda Sau koshitukulwa shaKavango West efimbo loufiku. 

Omukulunhu wopolifi koshitukulwa shaKavango West, Commissioner Julia Sakuwa-Neo okwa hokolola ta ti omukulupe okwa li tava di keendingosho nomufekelwa efimbo loufiku. 

Otaku hokololwa kutya omukulupe ova tokelwa keendingosho tava nwine omalodu pamwe noshitenya shaye. 

Opolifi oya hokolola tai ti omufekelwa okwa ufana inamweno opo a ka nangale meumbo lavo molwaashi vati okwa li a loloka okuenda. 

Inamweno oha di keumbo laye li li momukunda umwe neumbo lomufekelwa ashike efiku olo vati okwa dimina a ka nangekwe koshitenya shaye. 

Otaku hokololwa kutya omufekelwa okwa nhukila omukulupe ndele te mu longele omunyonena wopaixulo. 

Umwe womeumbo eshi a penduka okwa hanga omufekelwa ta kwata inamweno onghonga. 

Ota holoka momhangu nena nota pangulilwa oshibofa shekwatonghonga. 

Omakonakono opolifi otaa twikile kombinga yoshikumungu eshi. 

Nakuninga oshihakanwa okwa twalwa koshipangelo opo a ka ningilwe omakonakono opaunamiti. 

Okwa didilikwa ovakainhu va ninga oihakanwa yokukwatwa onghonga ngeenge tava di keendingosho. 

Opolifi oya kumaida ovakainhu opo va kale va kotoka ngeenge tava di keendingosho novalumenhu molwaashi ovalumenhu paife ohava kwatwa komhepo yokulongela ovakainhu ominyonena dopaixulo moixwa. 

Otaku hokololwa kutya ovalumenhu vamwe ohava landele ovakainhu omalodu nelalakano loku va kwata onghonga ngeenge va kolwa. 

Opolifi oya kumaida ovadali opo va xulife po okulandelwa mo omalodu koitenya yavo molwaashi otashi ulike efano lii nodino ngeenge inamweno ta landelwa mo koshitenya shaye. 

-fhamalwa@nepc.com.na