OMAIMBI – Ngoloneya mukulu woshitukulwa sha Hangwena Usko Nghaamwa pamwe nomunangeshefa Pinehas Nambadi ova tula oukuni kumwe okutunga okapangelo kashona pofaalama Omaimbi moshikandjohololo Amutenya mOndonga.
Nghaamwa okwa holola kutya okwa kwatwa kediladilo lokutunga okapangelo moshitukulwa shaShikoto molwaashi a mona kutya ovakwashiwana vopomudingonoko opo ohava ende oshinano shile okukamona ouhaku.
Nghaamwa eshi okweshi holola Olomakaya pefimbo ta taalele po Omukwaniilwa waNdonga, Fillemon Nangolo shuumbwa pofaalama yaOmaimbi.
Ngoloneya nale okwa holola yo kutya ovanhu vahapu ohava ende oinano ile, vamwe ohava ende eekilometa heyali okuya kOshivelo ile veli denge elila lile leekilometa 80 okukamona epango lopombada kodoolopa yaMuthiya.
Nambadi okweli yamba okuyandja edu apa tapa tungwa okapangelo kashona.
“Oipumbiwa ei ya pumbwa meendelelo ongaashi okaungulita, nedu lokutungifa,” Nambadi ta ti.
Nghaamwa okwa weda po ta ti ofaalama yaOmaimbi oyina omwaalu wovakwashiwana uli pombada nomwa lopotwa hamu kala omaudu mahapu.
Nghaamwa okwa ti vahapu ihava fiki koshipangelo unene ngeenge va etwa mo koshidu.
Okwa holola imwe ihai fikifa ovanhu koshipangelo ngaashi okulika keyoka, ta ti ovanhu vahapu ova kanifa eemwenyo davo eshi va lika komayoka nomolwaashi oihakulilo oili kokule ihava fiki ko vali.
Pefimbo opo tuu opo Nghaamwa naNambaditavayandjeomadiladilo okutunga okapangelo, ova eta po eedopi dokutunga nale ponhele opo tava ka tungwa okapangelo.
Eshi osha holola kutya oilonga yokutunga okapangelo aka oya hovela nale.
Omukwaniilwa Shuumbwa naye okwa holola kutya otaka kwafela okukwashilipaleka kutya otaka yambidida metungo lokapangelo.
Shuumbwa okwa indila ovakwashiwana va hangane nokutula oukuni kumwe opo va yambule po ofaalama yavo.
Okwa kunghilila ovakwashiwana va kotokele ovafita voipupulu tava lalakanene okuteya nokukufa kumwe ovanhu.
Okwa ti ovafita otava eta edundakano moshiwana moshiwana.
Shuumbwa okwa holola kutya ovafita voipupulu inava pitikwa moshitunda shaNdonga ngeenge kavena eembapila deli xwapo odo tadi yandje epitiko leengeleka davo.
Ngeenge kavena eembapila doumbangi weengeleka davo da yela tau ulike oushili moilonga yavo, nena taatayeni ovanhu. Ngeenge inava hala, ifaneni omalelo eni opo a kandule po oshinima osho.
-Nampa