Murugani gomukadi kevango lyoWindhoek Correctional ngesi vana muhagekesa posiruwo sosisupi konyima tupu apa vana kumugazarera asi kazire mevango lyokul ikuhwira nomunadorongo gomugara. Eyi kuna kara asi kapi vayipulisira nampili nakauke kukwama veta zawo ezi vatura pomavango gangesi komisara goCorrectional service Raphael Hamunyela kayinkondopekere kwaNew Era asi yii sihorokwa sangoso kasihorokere mosikondovike. Age kagwedereko asi munamberewa ogu, ngesi kuna kara nye mekonakono morwa mukaro ogu ana kara nago noyo karugene. Hamunyela katente asi murugani ogu kavamumwene mefano age hena simpe moyirugana ana kara. 

‘’ Konyima zomakona kono, yitundwamo ngayi tanta nye asi tavamutjida ndi hawe, yimo ana kugwedako. Hamunyela simpe katente hena asi eyi karugene muna mberewa ogu hawe kapi yina kara paveta. Age kahundilire varugani vemevango eli asi vahepa kukwama ngendeseso noveta zakarapo, ezi zakara asi nare vazitura mosirugana yivatere asi ngapi omu navarugana nomunavakara pevangio eli. ‘’ Ose nkenye apa kugava marongo, kovanamberewa vetu, yipo vakare asi awo kuna kukwama veta nonongendeseso twakara nado. 

Nampili poopo nye atukara nedeuro, vanamberewa navenye kuvaronga asio ngapi navakara nomukaro dawo,’’ yimo ana kutanta. Hamunyela katente asi vana mberewa ava kuna kara nomaudigu gomanzi unene, muna hamene uvera momutwe. ‘’ Ngomuhoko, twahepa kuruganena kumwe omu natumona nokutara asi ngapi natuvatera vanamberewa vetu ava. Awo pausili kuna pumbwa mbatero,’’ yimo ana kugwedako. Hamunyela kuna kutanta simpe asi kutwara nofungu kovanadorongo ntani epangwe momavango nagenye govanadorongo kuna kara mukaro dona. ‘’ Ezi kuna kara mbudi zongwa. Vana mberewa kuna kara asi kuvhura varugane unene omu navatara asi kwato kutwaramo epangwe,’’ yimo ana kutanta. Age kayinkondopekere asi varugani kuna kurugana nawa unene ngwendi konondima ntani kwayimwene. 

-fhamalwa@nepc.com.na