Mulisa Simiyasa

Otjiwarongos – !Nakaǂnôa ministers, Kai!ā tsî !Garo!ā Omkhâisens dis, Evelyn !Nawase-Taeyeles ge ǀgūǁae Otjiwarongos !nâ ǂhanusise !nona !hū!âdi hîa omkhâisens !aroma n hâ ǁaxasina nî !khōǂgāse tsî omde ǂnuwis projekde tsîna ge ǂanǂan, Nē projekdi hîa Otjiwarongos !Ā!khōmais !khōdanas !naka nî hâdi ge 16ǁî Khoraǂuis !âb ai ge dīhe, ǁnāpas ǀnai !ā!khōmaisa a ǁaxa ǁgam-e sī-ūs proxrammi tsî paiga ǁguiǂgās ǀkhase. Nē sîsengu ge Otjiwarongos !Ā!khōmais di !hū!âde omkhâis !âhuru-aob, Development Workshop Namibia (DWN) ti a ǂansa ǂharugub xa a ǀhawe-ūhe. Paigu !aroma āga khaos ǀkhas ge DWNsa ǀnai 2 !Khaitsâb 2025 dis ai Otjiwarongos ǂnaumâiǁanǁgui-i !nâ ge tsoatsoa. “DWNs ge !âubasensa !oa N$4.5 miljunmaris xa !nāsase n sîsenū, !hū!âde !anu!anu tsî ǂhâbasa !gao!gaoxūna sō-ūs !aroma, Khoraǂuira 16 tsî 17 hâra !aroma ǀgui,” tis ge !Nawase-Taeyelesa ge mî. Ministers ge noxopa a mîs ge, nēs ge Otjiwarongos !Ā!khōmaisa ǀnîkhamikō hektargu !hū!âsa ǀkhaeb ase Shack Dwellers Federation of Namibiasa (SDFN) a māsa, ǁîs 204 ǁanin ǁnā !ās !nâ omde nî ombasen ǁkhāse. 

Nē aiǁgausas gere sîsenū soab ais ge ministersa hoa !ā!nāsi ǂgaeǂguide !hūb a ǂhabase gere ǂgan, î di !hū!âde SDFNsa ǀkhae, ǁîs ge !nākorobe a ǁkhausen ǂgomhe ǁkhāses ommās ǀkha Namibiab !nâ a ǁaxasa amaga. 

Namibia Housing Action Groups (NHAG) tsîn ge -ǁîs ǀkhāba xu mîmâisa ge dī, N$6.5 miljunsas nî 24 tsî 25ǁî Khoraǂuira aiǂhomis !aroma sîsenūsa, ǁnāpa di ǀhaob ai 100 omde nē nai nî ǂnuwihetsoatsoase. “Sadu ǂhanub ge ǀkhara ǀawede nēsisa ūhâ, !garob ǁga du nî ǂkhari-omn khais xa ra !aromahese ra !gûs di mâsiba kai!ādi !nâ ariǂuis diba. ǁKhātib ge sadu ǂhanuba blē-omdi !gôaga !hū ra ǀoroǀoros aweǁguib tsîna ūhâ. ǁNā-amaga, a da om!nôan hîa da ǂnaumâiǁanǁguigu !nâ ūhâna ǂgaoǀkhāsa !harib !oa sī-ū tsî ǂnuwiǀui-omn xa ǂâitsoatsoa, ū da hâ ǀoro maririn ǀkha,” tis ge ministersa ge mî. 

Otjiwarongos di !ā!khōmai-aob, Gotlieb Shivuteb ge ge mî, ǀaweǁguib !oan 4 000 !hū!âdi tsî omdi tsîna nē !nona !hū!âdi omkhâis tsî tsî omde ǂnuwis !âhuru-aon xa 2025 tsî 2026ǁî kurikha !nâ nî ǁkhaeǁnâhesa. “ǀAweǁguib nē !nona  ge tsoatsoa tsî ge dītoahe tsî da ge nēsi sîsenni di ǂnāǁnâs ǀguisa !âu hâ,” tib ge ge mî. Otjiwarongos ge ǁaupexa 54 000 ǁanǂgāsabena ūhâ.