Ministeli zovakondjeli manguruko kwaruganesa yimaliwa yokusika ko N$2.5 nomiliyuna omu vavatera ava vakondjerere sirongo esi simanguruke wokusika ko 363 meyereko lyoyimaliwa yelima 2025/2026 mvhura ozo, Ministera Frans Kapofi yimo ana kutantera mbongarero zanavenye sivike sina puko.
Omu nye kakere asi kuna kutura pelikwamo lyeyereko mvhura 2026/2027 omu nye ana kunkondopeka eyereko simaliwa esi siba kara asi soministeli zendi, Kapofi katente asi oyo yapwagamo kunakulikida asi epangero kwalituramo unene mokuvatera varwi vawo vanare.
Epangero kwalituramo uenen mokukeverera varwi vawo vanare ava nye vakere asi kwakondjera sirongo esi nomuhoko gwaso,’’ yimo ngoso ana kutanta.
Kapofi simpe kagwedereko asi ruha nye rokuvatera varwi vanare kuna gwana yimaliwa yereko yokusika koN$1.5 biliyuna mosiruwo nye esi, yina kara asi 94% kwayiruganesa mokuwapukurura eparu lyovarwi vanare ntani kupungura nye masanseko kweyi yahorokere mokukondjera emanguruko.
Sinzi soyimaliwa eyi, kwayitulirapo asi owo ava gwana yimaliwa yawo nkenye kwedi, yimaliwa yangoso yahepa nye kusika koN$1.1nobiliyuna, nosivaro sava vagwanenamo mauwa kuna kara wokusika ko 23,694 vakwayita vanare vakondjerere emanguruko.
Yimwe yitundwamo kuna kwateremo N$313.4 miliyuna kwayiruganesa konoprojeka dopaumwene dovarwi vanare omu dina kuvatera wokusika ko 1 840 vagwanenamo mauwa, N$30 miliyuna kwakara nye yina avafutu rumwe tupu eyi vagwana nye wokusika ko 609 kwayifuta nye komuntu mundinda gwendi ava vatuliremo ehundiro, ano N$834 523.06 kwayiruganesa mokuvafutira ava vaverere awo kwasikire ko vantu 37.
Mokuza nye komeho, Kapofi kafatwilire asi yimaliwa yokusika ko N$1.5 yonobiliyuna yelima 2026/2027, kwayiyereka nye kukwama malikwamo gatatu gana kara asi gohjepero.
Etekuro nye lyovarwi vanare kuna vatulire nye yimaliwa yokusika ko N$1.4 biliyuna eyi nye navavapa nkenye kwedi, oyo navapa varwi vanare vakondjerere emanguruko, yokugava siruwo simwe tupu, yokuruganesa kouhaku mokuvadeura ndi asi vahufune, ntani silinga nye zowo vakara mokomitiye ntani komitiye zokugava magano.
Evango nye eli vatura lyokupungura kweyi twaruganesere uye wina ako kuna gavako tupu nye yimaliwa yokusika ko N$13.8 nomilyuna, ano ayo yono veta ruha nye arutarurura noveta dawo nokuvatera koyirugana awo ngava gwana yimaliwa yokusika ko N$ 126.3 yonomiliyuna.
‘’Makura ame kuna kumuhundira vafumandekwa asi mukwatesengeko nokupulisira yimaliwa eyi yokusika ko N$1 522500 000 yoruha 31; yovarwi vanare vanare meyereko simaliwwa 2026/2027.
Epangero lyosirongo saNamibia ngalitwikira kutekura vakondjeli manguruko vawapukurure eparu lyawo mokuvatara asi vahahepa ,’’ yimo ana kutanta Kapofi.
-Nampa