Auleria Wakudumo
Okaana kokakadona, keedula 10 okeli moshipangelo molwa eshi ka nwa ombike. Oshiningwanima eshi osha ningilwa momukunda Oupumako mOngwediva, mOmaandaxa lwopo12h00.
Omukulunhu koshikondo shokukonaakona oimbuluma mOshana, Deputy Commissioner Fredrick Ndjadila okwa koleka oshiningwanima eshi. Ndjadila okwa ti okaana oka nwa oshitata shekende lombike ka hanga meumbo poushiinda.
Vati okaana okeli vakela melimba lopoushiinda nelalakano ka vake oikulya melimba ndele take litu ekende lombike, la holekwa modoloma ili melimba ndele take li finyuna. Ovashiinda vati oveya ashike okulitwa okaana ka kangavala melimba, ka kolwa koo okeli monghalo ii.
Oka twalwa koshipangelo kOngwediva Health Center nokonima oka tuminwa koshipangelo shepangelo kOshakati oko ka tambulilwa meembete.
Ndjadila okwa holola ta ti okaana okeli monghalo ili xwepo nomakonaakono omoule otaa twikile.