Festus Hamalwa
Ehangano lokuyandja ohonde kovanhu moshilongo loNamibia Blood Transfusions Service ola taalela eshongo linene eshi moipangelo mu na omhumbwe yohonde inayi wana okuyandja kovanhu.
Ovanhu otava ende nakashona okuyandja ohonde unene tuu koitukulwa yokonooli kwa didilikwa ku na omwaalu wovanhu u li pedu neenghono eshi omandiki okuyandjela ohonde ha ku kala ku na ashike ovanhu vatano mefiku omanga efiku limwe ovanhu ihava holoka, naashi osha eta moipangelo mu kale muhe na ohonde ya wana.
Edi oda popiwa komupopiliko wehangano lohonde Titus Shivute eshi a ninga eenghundafana na Kundana, ta hokolola ta ti moipangelo omu na ovanaudu vahapu va pumbwa ohonde ashike kape na sha ohonde yokuyandja.
“Ohandi kunghilile oshiwana opo shi ye momwaalu muhapu shi ka yandje ohonde shaashi ohonde oya fimana kovanhu ve li momhumbwe yohonde, onghee okuyandja ohonde okwa fimana unene osheshi otashi xupifa eemwenyo dovanhu nokukaleka po ovanhu ve na oukolele,” Shivute ta ti.
Shivute okwa ti ohonde tai yandjwa koshiwana ohai kwafele momikifi da yooloka, nokukwafela yoo vali ngeenge ovanhu tava tandwa ile oomeme tava pulumuna.
Okwa ti oshiwana nashi topolelafane omauyelele e na sha nefimano lokuyandja ohonde opo ovanhu va kale ve na eudeko kombinga nghee sha fimana okuyandja ohonde.
“Ohatu ka tameka nokuninga oikonga meefikola momwedi tau ya opo tu xwaxwameke ovanafikola va kale ve na ohokwe yokuyandja ohonde,” Shivute ta ti.
Okwa ti endiki lomOshakati ohali longo Etine keshe omanga endiki lomOndangwa puGwashamba ohali longo Etivali keshe.
Okwa weda po ta ti oshiwana nashi twikile okuliufa komilandu edi da tulwa po okukelela ombuto yoCovid-19 efimbo keshe ngeenge tashi ka yandja ohonde.
fhamalwa@nepc.com.na