Tja ire atji puratene ongukutu yohoromende okutwa momaunguriro Onḓuvasaneno yaPamwe, Ojoint Declaration (OJD) nu nokuhina okuhungirira kOJD tjazumba atji twa kotjitiha onguramene yatjo atji tanauka ombongarero ai yanderembo.
Otjimbumba tjozombara za Kandjoze tji tja hakayenene nOperesindenda Onongo Nangolo Mbumba nowokehi ye, Omutjuṋikwa Netumbo Nandi-Ndaitwah ngwa kuramene okurira otjiuru tjehi otjiveke tji matji yende. Otjikara tjokati tjOtjiṱiro Otjindjandja ngunda katji ya manuka kaparukaze tjinga atji hi ya vasisiwa omukoka mbwa sere kurira kutja oowomayandero.
Katji ya vasisiwa komayandero watjo mena rokutja ngunda ohoromende aya sere okutupuka pu novandu varwe, tjinene ozondekurona kutja ve pasane okati ngandu komundu omusenina ngu ma twara okati komukoka womayandero, ohoromende nai i ritupukira oini ngunda otjikara atja sere okutupukwa ovandu pekepeke mbu mave pasana okati ngandu ku ingo omusenina ngu me ketwara komukoka. Ihi ootjiṋa otji tji tjita kutja ape ha kara ondoṋeno mOtjiṱiro Otjindjandja. Okusasaneka nEhi rOvandoitji otjikara itjo tjayo ai he ritupukire nungwari ai pasana okati. Ozombara naze raere Mbumba kutja otjikara iho tje kamanene nu tji tja sewa ko eye okuyandja okati kotjikara inga mOtjiṱiro Otjindjandja ku Nandi-Ndaitwah.
Munao nambano otji pe ri ku Nandi-Ndaitwah, na kangamwa auhe eye ku ma yandja otjiungura ihi, okukauta otjikara ihi komautiro. Nokutjitwara komukoka womayandero womatupukiro. “Matu zeri kutja otjikando tji ohoromende kai nokukondja okuritupukira otjikara tjokati tji. Tjinga ohoromende kourike wayo ai hi na mai yenene okuritupukira otjikara tji aiyerike otja tji i tjita,” Ozombara maze tja.
Amaze raisa kutja otjikara tjimuna hi katji pwirire okutupukwa i yomundu umwe kourike we. Tjinenenene ku notjimbumba tjovatupuke tjEhi rOvandoitji. Otjo tji tji tupuka novatupuke vatjo avehe nokuura.
Wina otja tja tanda nokuyanisa kutja mounane we wehi oviṋa kavi tji nokuuhara amavi kara otja tji vi kara, tjingetjo mOtjiṱiro Otjindjandja, Ondjesiro nOtjisuta, avi kara otja tji vya kara.