Kansela moshikandjohoololo shaNehale lyaMpingana Joseph Shilongo okwa ti ovakalimo vomoshikandjohoololo shaye ova taalela eshongo linene lomhumbwe yeendjila eshi di na efululu.
Okwa ti ovakalimo vomikunda domoshikandjohoololo osho ove na eetuwa dishona onghee ihava dulu okushinga momafululu shaashi eetuwa davo otadi kala di dame.
Ovahongifikola novapangi hava longo keefikola nokoupangelo vomoshikandjohoololo Nehale lyaMpingana ohava kala tava nyenyeta konghalo yomhumbwe yeendjila shaashi ihava dulu vali okushinga momafululu omanga vamwe hava ende kolupadi ngeenge tava i koilonga.
Shilongo okwa ti ovanhu vamwe kave hole okukala tava longele moshikandjohoololo shaye shaashi ohava kala va tila efululu.
“Unene tuu ngeenge ovanhu va pummbwa omayakulo opauhaku ngaashi ovakulupe ngeenge va ombokelelwa momaumbo ohashi kala eshongo linene opo eetuwa di fike ko kuvo shaashi oku na efululu lihapu,” Shilongo ta ti.
Okwa ti ovanhu vamwe ohava ende eendjila diledile va humbata ovakwapata vavo tava ka konga omayakulo ouhaku koupangelo vokokule.
Shilonga okwa hokolola yoo vali ta ti ovakainhu ve li momateelelo navo ova kumwa konghalo yomhumbwe yeendjila eshi hava ende eendjila diledile tava i komafulo koupangelo shaashi eetuwa ihadi dulu okufika komikunda davo molwefululu.
Kansela okwa weda po ta ti moshikandjohoololo shaye omu na yoo vali omhumbwe yomeva eshi oshiwana tashi dengwa kenota hashi ende oshinano 10km tashi ka konga omeva.
Okwa hokolola ta ti ovakalimo vamwe ohava nu omeva a lula eshi eemboola dimwe domoshikandjohoololo shaye di na omeva a lula omanga vamwe oha kateka komikunda dokokule okukuna omifima.
Shilongo okwa indila ouministeli weendjila osho yoo ouminiteli wounamapya, omeva nomatululo omadu opo u kale wa kandula po omukundu u li moshikandjohoololo Nehale lyaMpingana.
fhamalwa@nepc.com.na