ONDANDWA- Minista woukumwe wopailongo nomangeshefelo Selma Ashipala Musavyi okwa ti omaulikilo oipindi okwa fimana shaashi otaa etele eedoolopa oyuuyemo osho yo omaxumokomesho. 

Edi minista okwe di popya onghela pefimbo a patulula pambelewa omaulikilo oipindi aNdangwa. 

Neudo omaulikilo oipindi aNdangwa otaa dimbulukiwa koshi yoshipalanyole “Okutwala omangeshefelo omoshilongo kondje yoshilongo” 

Omaulikilo oipindi okwa tamekele momafiku 24, notaaxulu momafiku 2 May. 

Ovanangeshefa 210 mwa kwatelwa omahangano a yooloka ota kufa ombinga komaulikilo oipindi. 

Mopaife ngaha eshi oshi li oshikando 13 elelo lodoolopa yaNdangwa ta li ningi omaulikilo oipindi. 

Oshiwana, ovanangeshefa mwa kwatelwa kaume komaulikilo oipindi omukwaniilwa Shuumbwa Nangolo okwa li va holoka momwaalu muhapu. 

Minista okwa ti omaulikilo oipindi okwa dana onghandangala ya kula okuyambula po odoolopa. 

Okwa ti natango ei omhito iwa koshiwana unene tuu kovanyasha okulandifa oinima yavo. Ashipala Musavyi okwa weda po ta ti omaulikilo oipindi otaa yandje omhito kovanhu va ulike ounongo wavo tashi pitile pamukalo momangeshefelo. 

“Onga minista momangeshefelo ondi udite etumba okumona ovanangeshefa va dja momudingonoko wNdangwa tava kufa ombinga okulandifa oikulya yoshiwambo,” ta ti. 

Okwa twa ovanangeshefa omukumo opo va twikile okulandifa shaashi otava kwafele okulwifa ondjala nokueta po eemhito doilonga. 

Mayola wodoolopa yaNdangwa Ester Auala okwa ti elelo lodoolopa yavo ota li twikile okuninga omaulikilo oipindi molwaashi otashi ya nane ovanangeshefa okudja koitukulwa ya yooloka okukufa ombinba. Onghela natango, minista okwa li a mona omhito yokukala momutumba novanangeshefa nenelalakano lokukundafana omashongo aa taalelwa kovangeshefa osho yo nghene ve na okuyambidida. 

Ovanangeshefa okwa li va mona omhito yokupula omapulo minista. 

–fhamalwa@nepc.com.na