OONGWEDIVA – Minista omukulu gwiiyenditho niilonga Erkki Nghimtina okwa hulitha mepupi lyomimvo 77 mOsoondaha. 

Nghimtina okwa yambukile momukunda Eembidi, moshitopolwa shaHangwena.

Nghimtina okwa longela epangelo lyaNamibia ongaminista miikako yi li ine, okuza momumvo 1997 sigo 2020, ongaminista gwetanga lyegameno, gwoomina niikwankondo osho wo gwiilonga. 

Nghimtina okwa li wo a dhana onkandangala onene ethimbo lyekondjelomanguluko lyoshilongo shika, ongagumwe gomaakwatelikomeho gongundu yoSwapo okuza mo 1979 osho wo omukuluntu gwomauyelele gwongundu yoPLAN.

Natango okwa li oshilyo shomutumba gopashigwana okuza mo1995 sigo 2020.

Iilonga yaNghimtina oya ndhindhilikwa koyendji osho wo nkene a kondjele emanguluko lyoshilongo shika.

Omupresidente gwongundu yompilamena PDM, McHenry Venani, okwa ti Nghimtina okwa li kuume ke lela.

“Okwa li omulumentu a mwena, i ilongelela ye oku na omikalo,”te mu tanga ngaaka.“Ka li omuntu gwiitya oyindji. Okwa kala wo ta longele ongundu tayi pangele nuudhiginini,” ta popi ngaaka.

Venaani okwe mu dhimbulukwa ongakuume ke kashili, ya kala pamwe ethimbo taya longo uunafaalama pamwe osho wo okwiitulila mo omayele.

“Onda kanitha kuume kashili, omumwameme na vululukwe nombili,” ta ti ngaaka. Okwa gandja wo omahekeleko kaakwanezimo osho wo koyana nokomuselekadhi.

Omuprima omukulu gwoshilongo ngoka oye omunashipundi gwoSam Nujoma Foundation, Nahas Angula, okwa ti, Nghimtina okwa li wo oshilyo shoSam Nujoma Foundation. “Otandi gandja omahekeleko peha lyoSam Nujoma Foundation. Nghimtina okwa kala nokuyambidhidha pamikalo adhihe, onkene otwa kanitha ependa,” ta popi ngaaka.

Angula okwa ti, oku mu shi ongependafulo ndyoka lya yambidhidha noku kondjela uuwanawa woshilongo shika.

Ngoloneya kwa i gwaHangwena Billy Mwaningange, okwa ti Nghimtina okwa kala kuume ke okuza omanga aanyasha.

“Omulumentu nguka ondi shi oku mu hokolola oshoka ekwatathano lyetu naye olya kala lya pama sigo twa yi kombanda,” ta hokolola ngaaka. 

Ta ti, sho ya yi kombanda momumvo 1974, oya li ya ndhindhilikwa ongaanyasha ye na ondjungu noya li ya dheulwa mbala ya ninge aakwiita. 

Mwaningange ta ti, kuume ke okwa li a yelwaayelwa e ta ningwa omukuluntu gwomakwatathano koLubango. 

Omupopyoki mopolitika Ben Mulongeni okwa ti, Nghimtina okwa li omukwathi, omulumentu gwomwenyo omwaanawa.

“Sho nda li ko-NBC, okwa kala nokuyambidhidha ndje, nonda ilongo mo oshindji muye,” Mulongeni ta ti ngaaka.

Ta ti, okwa kala noku mu kumagidha a ninge shoka shi li mondjila.

-vkaapanda@nepc.com.na