EENHANA – Neudo modoolopa yEenhana otamu ka tungwa omaumbo 100 kehangano ledina National Housing Entreprise (NHE) nelalakano lokukandula po omukundu wokuhe na omalukalwa.

NHE ehangano lepangelo hali tungile ovanhu omaumbo kondado yopedu.

Ovanhu ve na oyuuyemo ishona navo ova mona omauwa okutungilwa omaumbo kehangano eli.NHE oha tungile ovanhu omaumbo keedoolopa da yooloka moshilongo.

Onghela elelo lodoolopa yEenhana ola yandja edu kehangano eli.Omunambelewa a dja kehangano lo-NHE Indileni Set- Sam Iipinge okwa ti ehangano lavo ota li twikile okulonga nelitulemo opo li tungile Ovanamibia omaumbo kondado yopedu.

Okwa ti ehangano lavo ola pandula omalelo eedoolopa eshi e na ekwatafano liwa noNHE nokukwashipaleka kutya ota li yandjaneke omadu.

Okwa ti osha fimana ngeenge omalelo eedoolopa ta yandje omadu kondado yopedu shaashi eshi otashi kwafele ovanhu va tunge po omaumbo avo.

Iipinge okwa pula omahangano oo e na oshinakuwanifa shokutunga omaumbo opo va longe nondjungu nokukwapaleka kutya omaumbo okwa tungwa a kola.

Mayola wodoolopa yaEenhana, Omri -Onn Kavandje okwa pandula ehangano lo NHE eshi ta li ya kula nawa oshiwana okuvatungila omaumbo.

Kavandje okwa pula omahangano oo tungu omaumbo opo a yandje oilonga kovanhu va dja momudingonoko waEenhana.

Okwa ti muni waEenhana ota lalakanene okueta omayakulo popepi noshiwana nokuhambula po odoolopa.

Ovakalimo vomodoolopa yaEenhana ova pandula eshi NHE ta li ka tunga omaumbo 100.Ova ti paife otava ka ninga omaindilo okukala va tungilwa omaumbo.Omaumbo otaa tungwa ena omwaalu womadimo a yooloka.

fhamalwa@nepc.com.na