OSHAKATI- Ngoloneya woshitukulwa shaShana Hofni Iipinge melongelokumwe nehangano loRani Group ova yambidida ovalihongi 11 eshi va futilwa ofikola noshimaliwa N$140 000. 

Ovalihongi okwa li ve na eendjo doshimaliwa sha pumbwa okufutwa koiputudilo yopombada. 

Ovalihongi ohava fikola koiputudilo ngaashi IUM, UNAM, nosho tuu oiputudilo yopombada imwepo ya yooloka. 

Otave li hongele omaifano ngaashi oupangi, ouhongi nosho tuu. Oimaliwa yeendjo oya tulwa koumbo veembaanga doiputudilo haku fikola ovalihongi ava. 

Iipinge okwa ti okwa shangelwa omukanda kovalihongi va yooloka ta kwena eshi ve na eendjo doshimaliwa dokufuta koiputudilo. 

“Okudja opo ondayakombelewa yehangano loRani Group opo ndi ka konge omakwafo oshimaliwa shokuyambidida ovalihongi ava,” ta ti. Okwa ti okwa pewa oshimaliwa N$140 000 ndele ta ka kufuta eendjo dovanafikola ava. 

Okwa twatwa ovanafikola omukumo opo ve lihonge nondjungu nokukala va pita nawa. 

Paulina Shetunyenga, te li hongele ouhongifikola koshiputudilo sho Hifikepunye Pohamba UNAM okwa pandula eshi a futilwa ofikola. 

“Okwa li handi kwena efimbo keshe da kanifa omukumo shaashi ndi na eendjo daUNAM doshimaliwa N$20 000. Paife ohandi ka twikile elihongo lange shaashi onda futilwa ofikola,” ta ti. 

Natango, konima yoivike ivali ngoloneya okwa yandja oipundi 50 fikola Ekuku Primary School i li mOshakati. Okwa didilikwa ngoloneya waShana okudja omudo wadja ko eshi a ya koshipundi oka kala nokuyandja omakwafo koshiwana unene tuu ovanhu ovo ve li momhumbwe. 

Ovakulupe navo ova mona omauwa okuyambididwa okupitila mombelewa ya ngoloneya ou. 

Konima yoivike itatu natango, Iipinge okwa li a yambidida ovanafikola eshi va pewa omidjalofikola mwa kwatelwa omapando eenghaku. 

Okwa pula omahangano a yooloka e na ehalo lokuyambidida eefikola opo a kwatafane nombelewa yaye. 

“Osha fimana ngeenge hatu yambidida ovanafikola noikwafifohongo shaashi otashi vatu omukumo wokulihonga osho yo ovahongifikola va longe noupu,” ta ti. 

–fhamalwa@nepc.com.na