Abraham Mwanyekange
Ofikola Nalitungwe Primary School, moshitukulwa shaHangwena, oi li monghalo i tai nuwa omeva, molwa eengulu dofikola odo da mona oixuna.
Onalitungwe oya totwa po mo 1995 i li moshikandjolongo Oshikunde, moshitukulwa Ohangwena.
Umwe womo va hongifikola pOnalitungwe, oo a pula aha tumbulwe kedina okwa ti, eengulufikola davo odo da ningwa moipeleki oda kulupa, noka di li va li monghalo tai dulu okulongifwa.
“Paife odula ngeenge ta i loko omeva oha eya fiyo omongulufikola ndee taa talama pedu, naashi oha shieta tu haa pule komesho neetundi manga. Unene tuu eengulufikola dondodo onhi-3 fiyo onhi-7,”tati.
Okwa twikila kutya, ova didilika ovanafikola ita va fiki kofikola ngeenge odula yaloka molwaashi kave na apa tava hongelwa shaashi oveshishi nale kutya mongulu omuna okukala mwa talama omeva.
Omuhongi okwa ti oupyakadi ou wataalelwa kofikola kaushi ashike weengulu dokuhongela tadi mono oixuna kodula, ndele opena yoo natango omaupyakadi amwepo a yooloka.
“Pofikola ka puna eepomba, oha tunu ashike meemboola. Otwa pumbwa yoo eengulufikola dipe, omaumbo ovahongi molwashi paife oha tu nangala ashike moupeleki. Otwa pumbwa yoo outenda vo network osho yo eepate dili xwepo,” ta ti.
Omukulunhuwiliki welongo kOhangwena Isak Hamatwi okwa lombwela Kundana ta ti oupyakadi weengulufikola moshitukulwa owahandjakana keefikola da yooloka.
Okwa yelifa yoo kutya no nande inaa mona olopota okudja kOnalitungwe, moshitukulwa natango omwa pumbwa eengulufikola da fika po 721.
Hamatwi okwa ti oshitukulwa osha pumbwa oshimaliwa shi fike peebiliona N$12, opo shi kandule po omhumbwe yeengulufikola.
Okwa weda po ta ti osho yo ebiliona N$12 i kandule po yoo eemhumbwe dikwao ngaashi omaumbo ovalongifikola noipumbiwa aishe yopeefikola.
Okwa ti ouyelele ou, ove utula yoo molopota ei va yandja kepangelo.
Okwa ti ngeenge ova mono oshimaliwa, otava kalonga tete neefikola edi da pumbwa ekwafo.
Okwa indila yoo ovadali va twikile no kuli tula mo melongo lounona vavo, ta ti nava twikile oku yambidida eefikola opo tadi nyengwa.
Okwa pula natango ovanangeshefa va sha keneke epangelo ondjilakati.
-abbenghilai@gmail.com