Ngoloneya woshitukulwa Ohangwena Kadiva Hamutumwa okwe lipyakidila nopologalama i na sha nokwiifana ovanyasha ve lishangife momadeulo e na sha nomadeulo ounangeshefa. 

Opologalama oyo ya teelelika i ka kale ko mo 11 Febuluali neudo, vati otai ka deula ovanyasha nghee ve na okuninga ongeshefa, etwomukumo osho yo omakwatafano a yooloka okudilila koilongo yokondje. 

“Opologalama ei oi li koshi yehangano olo hali ufanwa Tony Elumelu Foundation Entrepreneurship (TEF), ehangano olo lokondje yoshilongo, novakufimbinga ohave lishangifa kutya ove na ohokwe nova hala,” ta ti. 

Ngoloneya okwa ti omalishangifo okwa tameka nale momafiku a-2 fiyo omo 7 Febuluali, nokwa nuninwa ovanyasha ava va hala okukufa ombinga notava ka deulwa nghee ve na oku shi enda opo va yadeke eefooloma mondjila,” ta ti . 

Okwa twikila kutya ehangano lo-TEF ola kala ko nale, nola kala tali dana onghandangala yakula, mokukwafa ovanyasha molweendonghalamwenyo leengheshefa davo. 

Hamutumwa okwa yelifa kutya okwa hala ovanyasha vomoshitukulwa shaye ve lipake meengeshefa davo, vo va dule yo okunenepeka ounongo osho yo eendjila dokukulifa eengeshefa davo. 

“Ohandi pula ovanyasha aveshe moshitukulwa osho yo ava va djala omanguwo ve li moumaumbo inava mona oilonga ve lishangife, opo va dule oku linyangela,” ta ti. 

Omalishangifo oshimaliwa shoNational Youth Development Fund, oo a nuninwa okukwafa ovanangeshefa vomangeshefelo opedu, osho yo ava ve na omadiladilo onghee ngaho taa pula komesho. 

Ovalishangifi moshikonga eshi okudja peedula 18 fiyo o 45. 

-taimihaihambo2000@gmail.com