Opolisi moshitopolwa shaShana otayi kongo omukiintu ngoka a ekelehi ohanona tayi tengenekwa yi na ashike omasiku gatatu.
Sha ikolela kuuyelele wa gandjwa komupopiliko gwopolisi moshitopolwa shaHangwena Kaume Itumba, ohanona ndjoka kakwa li ya adhika moomwedhi dhokuvalwa, ano okapelema.
Ta ti, oya li ya adhika konima yomatungo goombelewa dhelelo lyopamuthigululwakalo mEenhana.
Otaku hokololwa kutya kape na uuyelele washa tau ulike uukwatya wuukakwashikekookantu oshoka olutu lwako okwa li lwa adhika lwa ninga nayi kashona.
“Otatu indile moshigwana kehe ngoka e na uuyelele kombinga yoshiningwanima shika nenge e shi omuntu a li metegelelo ihe ke li na we, ye kee na ohanana, ta limbililitha, opo a lopotele opolisi yi li popepi naye,” ta indile ngaaka.
Iiwike iyali ya piti, omukiintu gwomimvo 34 okwa mangwa po kopolisi moshitopolwa shaMusati, ta tamanekelwa edhipago lyohanona tayi fekelwa yi na iiwike itatu.
Otaku hokololwa kutya omukiintu ngoka okwa li a lopotwa konima a li a monika kee na sha ohanona omanga a li metegelelo lyi valelwa peni.
Sha ikolela komakonakono gopolosi gopetameko, omukiintu ngoka okwa li a kala nohanona mondunda ye yokulala, okuza esiku a li a imonitha okanona ye mwene.
“Ohanona okwa li e yi pondo sigo ya si, nomundhimba okwa li e gu ekelehi metoto lyiiyagaya yaMuni momundhingoloko Okahao,” opolisi ya ti ngaaka.
Omukiintu ngoka okwa tseyika nedhina Taimi Abraham, omu opaleki posikola Shaanika Nashilongo Secondary.
Oshipotha she osha li sha undulilwa komasiku 28 gaMaalitsa nuumvo.
Opolisi yaNamibia aluhe otayi kunkilile oshigwana okupitila miikundaneki shi hulithe po oku ekelahi nokundhipaga oohanona, ihe naye dhi tule poositasi nenge miipangelo ngele ooyina kaye na ohole nadho.
Martha Shinedima omuhungimwenyo gomomikunda okwa ti, omatompelo haga gandjwa koomeme taya ekelehi oohanona kage na ongushu.
“Yamwe ohaya gandja omatompelo kutya, he yohanona okwa ipatana epunda, yamwe itaya vulu okuhupitha ohanona omolwoshimaliwa kaashi po, yamwe oya tila okugeelwa momagumbo,” ta hokolola.
Uupyakandhi auhe mboka kau vule uupyakandhi wonkalamwenyo yoye we yi tula moshiponga wu li konima yekumba oshowo to kala nondjo koshipala shaKalunga sigo aluhe.
“Otandi kumagidha oshigwana shi hulithe po okulonga iiningwanima ya yatya ngaaka. Ino dhipaga, “ ta kumagidha.
vkaapanda@nepc.com.na