Abraham Mwanyekange 

Omupedudeuli wosipana yetanga lokeemhadi yedina Okamwandi, Raphael Nuumbembe okwa holola kutya ohai futu ovadani vavo nokulongifa oshimaliwa okutula peenhele eemhumbwe detanga mokapale kavo. 

Nuumbembe eshi okwe shi holola she likwatelela komapopyo ovanhu oo a ninga mahapu kombinga yoshimaliwa shospana. 

Okamwandi ohaka dana molixa onhival i yopedu moNamibia moshitukulwa shaShana. 

Nuumbembe okwa ti ospana oya totwa po koshiwana shopomudingonoko Onamula mOkatana mo2012 nelalakano okudana omaudano omomikunda. 

“Mo2022 okwa li natango oshiwana sha kala omutumba nokukufa etokolo opo ospana i kufe ombinga molixa onhinhatu yopedu mOshana,” Nuumbembe ta holola ngaho. 

Nuumbembe okwa ti kolixa oko ova kala ko ashike eedula mbali nopaife ove li nale kolixa onhivali nova hala modula tai uya va ye kolixa yotete fiyo va fika kwaai yopombada opo va tala omesho nova hala oku ka kala. 

“Ofye ashike tu na okapale ke li pondodo yopombada kOwambo molixa yetu. Ovadani vetu ohava pewa okashonanima kokomwedi. Otu na yo obesa yovadani notu na elandulafano liwa noli liwetikile”, Nuumbembe ta ti. 

Ta weda ko ta ti okuwete kutya aishe oyo oyomuimwepo ya nana ovadanauki opo va waimine Okamwandi okudja nokolixa yopombada moshilongo. 

Omukwatakanifi womaudano mOshana Sem Nekwaya okwa ti Okamwandi mOshana ohaka nane ovaholi vomaudano vahapu kokapale ngeenge tai dana. 

“Keshe umwe okwa hala okutala Okamwandi ta ka dana molwaashi oke na ovadani vondodo yopombada.” Nekwaya ta holola ngaho. 

Nekwaya okwa ti eespana domaudano paife dimwe odi na oumbada wokudana nOkamwandi molwaashi da tila okudengwa. Okamwandi oko ke li pombada yolixa itivali noitwa 18, ka shikulwa kOshana Nampol noitwa 15. Ovadani vamwepo vomadina tava hangika kOkamwandi ongaashi, Haidula “Nani” Fares, Johannes “Eembaka” Kanime naIsrael “Nani” Shikongo, aveshe ava ova dana nale moliha yopombada meespana dimwe. 

-abbenghilai@gmail.com