Elelodoolopa laNdangwa ola hololela enyeme kovakalimo vaNdangwa, eshi ve lipyakidila nokuhanauna omadidiliko omeendjila. 

Omupopiliko wodoolopa Petrina Shitalangaho-Mutikisha okwa ti omadidiliko omomapandavanda ahapu aNdangwa paife okwa ninga ashike atilifi, noku li pondodo yokupukifa ovashingi voihauto, shaashi ovakalimo vomeni lomodoolopa ove lipyakidila nokulongela oilonga ya puka komafano oo. 

“Omafano amwe okwa kweywa omadidiliko, ndele efano eshi li li ko omunhu ku li wete kutya ola hala okutya ngahelipi. Amwe nokuli okwa fanekwa neepena, omanga amwe a dimwa,” ta ti. 

Okwa twikila kutya amwe omomadidiliko ongaashi oo a shangwa taa lombwele omunhu a mbilike, a shunife omahooli pedu, a tanauke naakwao a wedwa po. 

Shitalangaho-Mutikisha okwa ti eshi oshi li oshiponga unene kovashingi voihauto, osho yo ovaendanamhadi. 

Okwa twikila kutya natango vati omikalo di li ngaha ohadi nane oshimaliwa shihapu moshikefa shelelodoolopa, ngeenge tali wapaleke oilonga i li ngaha. 

Shitalangaho -Mutikisha okwa yelifa kutya okulihumbata momukalo woludi eli, nokulonga oilonga yoludi eli, inashi ufwa paveta, nakeshe ou ta ka hangika ta longo oilonga i li ngaha, oku na okupewa ehandukilo loilonga yaye. 

Okwa lombwe la yo ovakwashiwana ve lihumbate momukalo u shi okulidinikilwa, vo tave li tu omukumo wokukaleka odoolopa ya yela. 

-taimihaihambo2000@gmail.com