Omahepeko gomomagumbo otaga yemateke – Endjala 

Omahepeko gomomagumbo otaga yemateke – Endjala 

ONHELEIWA- Ngoloneya gwoshitopolwa shaMusati Erginus Endjala okwa holola euvonayi omolwiipotha yomahepeko gomomagumbo tayi indjipala moshitopolwa. 

Sho kwa li kwa patululwa oshitaasi shopolisi kOnheleiwa Etiyali, Endjala okwa kumagidha oshigwana shi longithe osasiona ndjoka okulopota omahepeko taga ningwa momagumbo kuyele. 

Otaku hokololwa kutya Namibia okwa ndhindhilikwa e li ponkatu ontihetatu muAfrica lyomutenya, noopelesenda 80.5, ngele tashi ya kiiningwanima yomahepeko gomomagumbo. 

“Omahepeko momagumbo osho wo omadhipago oga konekwa taga indjipala, nohaga holoka unene moshitopolwa shaMusati,” ta ti ngaaka. 

Endjala okwa ti, omahepeko taga holoka momagumbo ong a a shi omadhipago, omakwato koonkondo omahepeko gokudhengwa omakwatombyambyona osho wo omahokanitho gaanona aashona. Ta gwedha po kutya omahepeko otaga yonagula oonkalamwenyo dhaantu, unene aanona aashona taya kwatwa koonkondo nokuyonenwa oosikola.“Oshitopolwa shetu shaMusati osho shimwe sha ndhindhilikwa shi na iipotha yi li pombanda yaantu ya ningilwa notaya ningilwa omahepeko gomomagumbo,” ta ti ngaaka. 

Ta kumagidha kutya oshigwana nashi mange uukuni kumwe opo shi kandule po omahepeko momagumbo. 

Omukuluntu gwopolisi moshitopolwa shaMusati Ismael Basson okwa koleke kutya omahepeko gaantu momagumbo osho wo omadhipago oga indjipala moshitopolwa shawo. 

“Nonando omaupyakadhi ngoka haga holoka, ohaga ningwa kaantu ayehe yomwenyo, iiningwanima oyindji otayi ningwa kaantu yopopepi noye shiwike,” ta popi ngaaka. 

Ta ti, opolisi oya kala nokukambadhala okugandja omalongo nkene oshigwana shi na okuninga uuna sha adhika komaupyakadhi ngoka taga vulu okweetitha omadhipagathano osho wo omahepeko gomomagumbo. 

Omugandji gwomauyelele gopol isi mosh itopolwa shaMusat i Anna Kunga okwa ti iipotha yomahepeko momagumbo oya ndhindhilikwa yi li 440 okuza Januali omumvo gwa yi sigo oDesemba. 

Ta ti, ethimbo lyomumvo 2021/2022 iipotha yi li 254 yomadhipago nomahepeko momagumbo oya lopotwa ya indjipala noopelesenda ndatu, yi vule yomumvo 2020/2021 mbyoka ya li 247. 

“Shoka otashi ulike kutya omahepeko otaga indjipala omumvo kehe, onkene opwa pumbwa okukutha onkatu, omanga oshilongo shetu inaashi teka po,” ta popi ngaaka. 

Kunga okwa ti, opolisi otayi tsikile okulonga nuudhiginini okukandula po osho wo okushonopaleka omahepeko gomomagumbo. 

-vkaapanda@nepc.com.na