Ondekurona imwe nomukwatera wa Namibian nai ngu hupira mOunited Kingdom, ousupi OUK, ma handura ozombura, ma tja ovakwawo ave kurungisiwa mominyo i yomarundururiro womazeva yousemba womaturiro yovandu vomahi yarwe.

Nungwari, Oversea Tjongarero, me ve kwambere ko okukengeza kutja aye ha ṱunu kuwo. Ovanamibia, mumuna Ovambanderu nOvaherero nai vetaurira kOUK mokutira okukongorerwa i yomihoko vyawo mena rozondjakaha kutja omena romaṱa na vyarwe. Tjikweya komaṱa mape tjiukwa kutja pa utwa orutu rovakazendu ovahepundu, mu vyarwe ovingi, mbe tja omauhonapare wombazu nomihoko vyovarumendu vawo mbaṱa ve ve yeka omaṱa, mu mu nozonganda poo omahi. 

Omandaha indi ohoromende ya UK otji ya tjivisire omaze pomape ngu ma yemunika no ku varwa otjomaṋiṋikize. Imba mbahii mehi nambano nambano ama vekara ozombura o-20 amave yandjerwa okukarerera. Tjiva mave yandjerwa okukarerera nandarire kave ya tjita ozombura o-20 tji va tjiti omaningiriro ndoovazu kave nyondorokerere mehi nu ve nohambwarakaṋa ndji ve nayo kehi ndo. Tjimwe tji matji hee Tjongarero tjimuna kutja ndoovazu ve ungura mave sokuraisa kutja ve notjitjamurongo kohoromende tji ve suta. 

Wina imba mbu mave paha okuṱirwa otjari nondjenda kutja ve yandjerwe mehi ndo kombunda yozombura azehe mbari nohinga, nḓe he ri kombunda yozombura ndano otja tji pe kara nai, omerihekeneno wawo maye yarukirwa okutara kokutja naṋi ongaro mehi rawo ya pwa nu kuwo ka ku tji nondandero rukwawo. Tjiva, mu mu novatombevoveta, ozondjuwo poo omasutiro wawo maye nanununwa. Wina pe nondando ndoovazu omaningiriro wawo kaye itaverwe mave yenene okurihekena otjikando tjimwe uriri tje he ri ovikando ovingi kutja vyokutarurura momaningiriro wawo. Rumwe rezeva ndi mari kendeke oro ndi rokutja kape nokukara nombitirapo yokutja ngahino u nomuhoko mOUK nu tji wa yarurwa kehi ku wa zire okutja nao okuhaṋa omuhoko poo omaṱunḓu. Onḓuvasaneno ya Europa yOumausemba womundu pu i ha yandjere. Ohoromende ya UK otji mai kondjo onḓuvasaneno ndji i rundururwe.